“Unë jam i gatshëm për nënshkrim, por Beogradi nuk po do”. Deklaroi kështu, kryeministri i vendit, Albin Kurti.
Gjatë raportimit në Kuvend për takimin e fundit në Bruksel, Kurti tha se Serbia më 26 tetor, ka dëshmuar që nuk është e interesuar për themelimin e Asociacionit.
“Serbia ose le ta pranojë nënshkrimin, ose të pranojë që nuk është e interesuar për Asociacion. E kjo e fundit duket që është qëndrimi më i ri i Serbisë. Serbia më 26 tetor ka treguar që nuk është e interesuar për Asociacion. Ndoshta për prirjet e Serbisë, duhet të flasin më shumë ata që kanë negociuar në të kaluarën, duke i besuar Serbisë, por unë jo. Edhe njëherë po e ritheksoj, unë jam i gatshëm për dhe i interesuar për nënshkrim, Beogradi nuk po dëshiron të nënshkruaj më mua. Ka nënshkruar edhe me PDK-në edhe LDK-në, aman më tregoni si ia keni bërë ju, që të mësoj edhe unë”, deklaroi Kurti para deputetëve.
Kurti po raporton në Kuvend për takimin e fundit që kishte në Bruksel në kuadër të procesit të dialogut me Serbinë, më 26 tetor.
