Policia e Elbasanit ka finalizuar operacionin policor të koduar “Metalurgjiku”, duke çuar në pranga 16 persona, ndërsa 8 të tjerë janë shpallur në kërkim, pas një hetim disa mujor me qëllim goditjen e veprimtarive kriminale kundër mjedisit në zonën e ish-Metalurgjikut në Bradashesh.
Sipas njoftimit zyrtar, janë proceduar penalisht dy subjekte juridike që ushtronin aktivitet të paligjshëm në përpunimin e mbetjeve dhe prodhimin e ferrokromit, duke shkaktuar ndotje të ajrit, ujërave dhe tokës.
Mes personave të arrestuar, 9 prej tyre janë shtetas të huaj, me role të ndryshme drejtuese, teknike dhe punonjës.
Të arrestuarit janë: Administratorë: J. C., 64 vjeç, shtetas korean; E. F., 48 vjeç, banues në Elbasan; Drejtorë prodhimi: B. A., 62 vjeç; E. B., 48 vjeç, të dy banues në Elbasan; Inxhinierë/drejtues teknik: E. B., 51 vjeç, banues në Elbasan; A. R., 31 vjeç, shtetas indian; Punonjës, operatorë dhe përgjegjës turni: R. P., 24 vjeç; S. P., 27 vjeç; D. K., 32 vjeç; R. Y., 38 vjeç; M. S., 43 vjeç; R. P., 24 vjeç – të gjithë shtetas indianë; P. K., 32 vjeç, shtetas nepalez; J. K., 63 vjeç dhe D. Xh., 45 vjeç, banues në Elbasan.
Po ashtu në pranga është vënë edhe shefi i Sektorit të Mjedisit në Bashkinë Elbasan, I. D., 60 vjeç, për veprat penale “Shpërdorimi i detyrës” dhe “Falsifikimi i dokumenteve”.
Janë shpallur në kërkim 8 shtetas, aksionerë të subjekteve tregtare: B. Z., 43 vjeç; D. K., 54 vjeç; F. M., 55 vjeç; Gj. B., 48 vjeç; A. Sh., 72 vjeç; S. O., 67 vjeç; I. L., 53 vjeç; A. K., 38 vjeç.
Ata akuzohen për veprat penale “Ndotja e ajrit, ujërave dhe e tokës”, “Fshehja e të ardhurave”, “Punësimi i paligjshëm” dhe “Pastrimi i produkteve të veprës penale”, kryer në bashkëpunim.
Sipas hetimeve, dy subjekte ushtronin aktivitet të paligjshëm duke ndotur ajrin, ujërat dhe tokën, duke mosrespektuar rregullat e menaxhimit të mbetjeve dhe duke përpunuar në mënyrë të paligjshme mbetje baterish.
Për këto shkelje u vendosën masa administrative, gjobë prej 3 milionë lekë për një subjekt, 10 milionë lekë për subjektin tjetër, si dhe pezullimi i aktivitetit deri në përmbushjen e detyrimeve ligjore.
/rtsh.al/
