Plot 14 vite punon në shërbim të pacientëve.
Infermierja Valbona Haziri, që më shumë se një dekadë punon në Klinikën e Onkologjisë thotë se puna me pacientët e bënë të ndjehet mirë.
Mes lodhjes, sfidave dhe orëve të gjata në spital ajo thotë se mundi iu shpërblye me çmimin e marrë nga Oda e Infermierëve të Kosovës.
“Edhe pse kam marr një çmim të tillë jam shpallur “ Infermierja e vitit”, nuk do të thotë që të tjerët nuk janë të mirë, por jam mjaft mirënjohëse jam e lumtur sepse kam një bagazh të gjatë këtu duke punuar”, ka thënë Haziri.
E nominimin e saj për këtë titull, nuk e kishte pritur Haziri.
“Kur e pash se krejt kishin shprehë dëshirën për me më nominuar ishte një ndjenjë se di qysh me thënë edhe e gëzuar edhe e habitur. Nuk do të thotë se nuk e kam merituar ose që nuk është dashtë me marr, por pa pas asnjë paralajmërim kur e pash ishte gëzim”, ka thënë tutje Haziri.
Për vite me radhë në shërbime të pacienteve, Haziri tregoi se çfarë e bënë të lumtur.
“Ne vetëm administrojmë barin tek pacientët, gjatë asaj kohe pacienti është i lodhur, i mërzitur është i habitur, kur vjen e sheh ambientin dhe e sheh se sa shumë e sa të sëmurë ka, ose pse kohëzgjatja, terapia është prej me të ndryshmeve. Andaj brenda asaj kohe nëse unë arrij që me një pacient të kem mirëkuptim edhe një qasje adekuate, një qasje që vërtetë pacienti mbetet i kënaqur dhe një një far forme i lehtësohet sëmundja atëherë ajo më bënë mua shumë të lumtur. Një fjalë e mirë, mjafton për ta shumë”, theksoj Haziri.
E motra Valbonë në ditën e infermierëve ka një mesazh për të gjithë kolegët e saj.
“Të jemi sa më korrekt, të jemi sa më të dinjitetshëm, të punojmë në mënyrën më të mirë që mundemi sepse nesër, pasnesër ne mund të jemi në shtratin e tyre”, ka përfunduar Haziri.
Ndërsa, për nder të Ditës Ndërkombëtare të Infermierisë përfaqësuesit e OIK dhuruan gjak.
