Nënkryetarja e Prishtinës, njëherit ushtruese e detyrës së drejtores për Arsim në kryeqytet, Jehona Lushaku-Sadriu, tha se i ka vizituar disa shkolla dhe se ato janë të pastra, raporton teve1.info
Përmes një shkrimi në llogarinë e saj në Facebook, Lushaku-Sadriu shkroi se ka takuar edhe disa punëtorë teknik pas kthimit të tyre nga greva, derisa shtoi se do të angazhohet për përmirësimin e kushteve të tyre të punës.
“Sot, shkollat e Kryeqytetit janë të pastërta 🤩
Ditën e nisa me vizitë në shkollat e Kryeqytetit. Së bashku me drejtoren e shkollës “Hoxhë Kadri Prishtina”, takuam punëtorët teknik të kësaj shkolle, pas kthimit të tyre nga greva.
U zotova para tyre, se do të punojmë intensivisht në përmirësimin e kushteve për ta. Bashkërisht do të punojmë për të mirën e nxënësve të Kryeqytetit ❤️”, ka shkruar Sadriu në Facebook.
Punëtorët teknik të cilët paguhen nga kompani private nëpër shkollat e Prishtinës kishin hyrë në grevë tri ditë më parë, duke shprehur pakënaqësitë e tyre me pagat dhe kushtet e punës.
Të enjten pas një takimi me përfaqësues të Komunës së Prishtinës, kanë arritur një marrëveshje duke e ndërprerë grevën dhe iu kthyer punës.
Tëvë1 qëndroi të enjten nëpër disa shkolla të kryeqytetit, ku papastërtia nëpër klasa mësimi ishte e lartë.
