Dymbëdhjetë kadetë të Forcës së Sigurisë së Kosovës (FSK) kanë diplomuar dhe kanë dhënë betimin solemn në një ceremoni të mbajtur në Kazermën “Adem Jashari” në Prishtinë, duke u graduar me gradën nëntoger.
Kadetët përfunduan me sukses studimet katërvjeçare në programin ushtarak në Qendrën për Studime Universitare pranë Akademisë së Mbrojtjes së FSK-së, si dhe përgatitjen akademike në Universitetin Amerikan në Kosovë.
Në ceremoni morën pjesë ushtruesja e detyrës së Presidentes së Republikës së Kosovës, Albulena Haxhiu, Kryeministri në detyrë, Albin Kurti, Ministri i Mbrojtjes, Ejup Maqedonci, Komandanti i FSK-së, gjenerallejtënant Bashkim Jashari, zyrtarë të lartë të FSK-së, përfaqësues institucionalë, partnerë ndërkombëtarë dhe familjarë të kadetëve.
Sipas FSK-së, ceremonia nisi me raportimin para ushtrueses së detyrës së Presidentes dhe Komandantit të FSK-së, ndërsa u përmbyll me betimin e gjeneratës 2026.
Me marrjen e gradës nëntoger, oficerët e rinj do t’i bashkohen radhëve të Forcës së Sigurisë së Kosovës, duke marrë përgjegjësi udhëheqëse në shërbim të vendit.
“Diplomimi dhe betimi përfaqëson një moment të rëndësishëm në zhvillimin e kapaciteteve profesionale të FSK-së dhe një dëshmi të përkushtimit për ndërtimin e një force moderne, të aftë dhe në përputhje me standardet më të larta ushtarake”, theksohet në fund të njoftimit./teve1.info/
