Nënkampioni i Kosovës në futboll, Ballkani, do ta luajë në shtëpi ndeshjen e parë kundër Shamrock Rovers në kuadër të raundit të tretë kualifikues të Ligës së Konferencës.
Ekipi nga Suhareka, të dielën ka njoftuar për zyrtarizimin e termineve kundër skuadrës nga Republika e Irlandës.
Ndeshjen e parë, Ballkani e luan të enjten (7 gusht) në stadiumin “Fadil Vokrri” në Prishtinë prej orës 20:30, ndërsa të kthimit një javë më vonë në Irlandë.
Ballkani, garimin në kualifikimet e kupave të UEFA-s, e ka nisur prej raundit të dytë kualifikues të Ligës së Konferencës, në të cilin ka eliminuar FC Floriana të Maltës me rezultatin e përgjithshëm 5:3.
Nëse e kalon edhe Shamrockun, atëherë Ballkani do të kualifikohet në “play-off” të Ligës së Konferencës dhe do ti duhet ta eliminojë vetëm edhe një kundërshtarë për të prekur fazën e grupeve.
Deri më tani, Ballkani është ekipi i vetëm nga Kosova që është paraqitur në fazën e grupeve të ndonjërës prej garave të UEFA-s.
Dy herë rresht, Ballkani ka luajtur në fazën e grupeve të Ligës së Konferencës.
