Mario Mitaj është huazuar te Genoa siç edhe u paralajmërua. Nga sot nis një rrugëtim i ri për mbrojtësin e Kombëtares shqiptare, pikërisht në Seria A.
Mitaj u kërkua edhe nga Porto, por në fund ishin 9 herë kampionët e Italisë që fituan garën.
22-vjeçari u rikthye kështu në Evropë për të dhënë kontributin e tij.
Pas eksperiencave me AEK-un dhe Lokomotivën e Moskës, tashmë është radha e Genoas.
“Genoa njofton se ka zyrtarizuar me Al-Ittihad transferimin, në formë huazimi me opsion blerjeje, të mbrojtësit të krahut Mario Mitaj. I lindur më 6 gusht 2003 dhe i formuar në akademinë e AEK, Mitaj, i pajisur me dy pasaporta, ka kryer vizitat mjekësore dhe ka një karrierë të rëndësishme në nivel ndërkombëtar. Me Kombëtaren shqiptare, ai numëron 32 paraqitje, duke marrë pjesë si titullar në Kampionatin Europian 2024. Me klubet ku ka luajtur, përfshirë Lokomotivën e Moskës, Mitaj ka zhvilluar 142 ndeshje në kampionatet greke, ruse dhe saudite, si edhe në kupat kombëtare dhe kompeticionet kontinentale. Në Arabinë Saudite, ai ka fituar kampionatin dhe Kupën e Mbretit në sezonin 2024/25”, shkruhet në njoftimin e klubit italian.
Mbrojtësi i majtë largohet nga Al Itihad me kujtimin e 58 paraqitjeve. Gjatë kësaj kohe fitoi edhe titullin kampion.
Pengesë e madhe në sezonin e kaluar ishte numri i lojtarëve të huaj që lejohen në kampionatin arab. Mitaj e shikonte veten shpesh herë jashtë planeve për këtë arsye.
