Deputeti i Lëvizjes Vetëvendosje, Salih Zyba, ka akuzuar partitë opozitare për bllokimin e funksionimit të Kuvendit të Kosovës, duke deklaruar se kjo bllokadë ka nisur ende pa u paraqitur zyrtarisht kandidati i VV-së për kryetar të Kuvendit.
Në emisionin “Info Nata” në Tëvë1, Zyba theksoi se opozita ka dalë me deklarata për mungesë të votave në favor të Vetëvendosjes, pa pasur asnjë përpjekje konkrete për të lejuar votimin.
“Opozita është ajo që po e bllokon Kuvendin, sepse ende pa e paraqitur ne kandidatin tonë, ata kanë dalë dhe kanë deklaruar se VV-ja nuk i ka numrat. Kjo, edhe pse disa nga kryetarët e subjekteve kanë thënë se do të votojnë për të ndërruar institucionet të njëjtit sot po bojkotojnë,” u shpreh Zyba.
Ai gjithashtu mohoi se ministrja Albulena Haxhiu është arsyeja e bllokimit nga opozita, duke e cilësuar këtë si një justifikim për strategji politike më të thella.
“Ndryshimi i qëndrimeve nuk është për shkak të Albulenës. Është për shkak të pretendimeve për ta vendosur VV-në në lajthitje dhe për ta shtyrë në ndonjë shkelje procedurale, që më pas të humbasë mundësinë për të formuar qeverinë. Nuk është dhimbta te këta Albulena,” tha Zyba.
Deklaratat e tij vijnë në një periudhë të ndjeshme politike, kur procesi i konstituimit të institucioneve po zvarritet për shkak të mungesës së konsensusit ndërmjet pozitës dhe opozitës.
