Kombëtarja e Kosovës në futboll, do të ketë mungesa të mëdha për dy ndeshjet e para të ciklit kualifikues për Botërorin 2026, që i luan këtë muaj.
Kosova brenda tri ditëve, më datën 5 dhe 8 shtator, do të përballet me Zvicrën në udhëtim dhe Suedinë në shtëpi në kuadër të Grupit B kualifikues, të cilin e përbën edhe Sllovenia.
Te Kosova, tashmë janë konfirmuar tri mungesa pasi krahas Milot Rashicës së lënduar, selektori Franco Foda nuk mund të llogaritë edhe në Edon Zhegrovën e Florent Hadërgjonajn.
Hadërgjonaj është lënduar, ndërsa Zhegrova është liruar nga grumbullimi për shkak të obligimeve që i ka te Juventusi, ekip të cilit iu bashkua nga Lille në ditën e fundit të afatit kalimtar të verës.
“Florent Hadërgjonaj, i cili pësoi një dëmtim ditën e djeshme me skuadrën e tij, do të zëvendësohet nga Ron Raqi. Ndërsa, Edon Zhegrova nuk do të jetë pjesë e grumbullimit pasi është liruar për shkak të ndërrimit të klubit dhe obligimeve që lidhen me të”, ka thënë menaxheri i Kombëtares së Kosovës, Bajram Shala.
Selektori Foda ka shtuar se vendimi për Zhegrovën edhe i kuptueshëm shkaku i procedurave të transferimit te Juventusi, ndërsa ka insistuar se mungesa si e tij ashtu edhe e Rashicës janë të përballueshme për Kosovën.
“Jemi në kërkim të zgjedhjeve të reja dhe në të kaluarën kemi treguar se jemi të gatshëm të përballojmë të gjitha mungesat. Jemi shumë optimistë që në ndeshjet e radhës edhe me mungesat e tilla do t’ia dalim. Jemi shumë optimistë se do të kemi rezultat të mirë”, ka thënë Foda.
“Dardanët” të hënën pasdite kanë nisur grumbullimin për ndeshjet e shtatorit, në të cilat pritet të debutojnë edhe dy prurjet e reja, Leon Avdullahu e Veldin Hoxha.
