Trajneri i Juventusit, Igor Tudor po shpreson që ti ketë në dispozicion dy përforcimet e fundit, Edon Zhegrovën dhe Lois Opendan për ndeshjen kundër Interit, që luhet më 13 shtator në kuadër të kampionatit italian.
Në fakt, Tudor po pret që dy futbollistët të jenë në gjendje të mirë fizike, në mënyrë që ti inkuadrojë në këtë ndeshje.
Megjithatë, dyshime ka te futbollisti i Kosovës, Edon Zhegrova, i cili nuk ka luajtur prej dhjetorit të vitit të shkuar për shkak të një lëndimi.
Sulmuesi i krahut, nuk u bashkua as me Kombëtaren e Kosovës për ndeshjet e këtij muaji me Zvicrën e Suedinë në kuadër të kualifikimeve për Botërorin 2026 për të qëndruar në Torino që të përgatitet sa më mirë.
Përderisa Openda është i grumbulluar me Belgjikën, te Juventusi po punojnë me Zhegrovën për ta bërë gati për derbin e madh.
Tudor nuk po dëshiron të rrezikoj me Zhegrovën, i cili ndeshjen e fundit e ka luajtur më 14 dhjetor dhe për këtë arsye nëse e fton në ekip ndaj Interit, trajneri kroat nuk pritet ta inkuadrojë prej fillimit.
Mbetet të shihet se sa minuta do ti ketë Zhegrova ndaj Interit, i cili iu bashkua Juventusit në ditën e fundit të afatit kalimtar të verës nga Lille.
