Sezoni 2025/26 i Superligës së Kosovës në basketboll, i paralajmëruar për të nisur më 4 tetor sipas të gjitha gjasave do të shtyhet.
Shtyrja e sezonit të ri, është e detyruar të bëhet për shkak të zgjedhjeve komunale në Kosovë, të cilat do të mbahen më datën 12 tetor.
Megjithatë, Komisioni Qendror i Zgjedhjeve ka njoftuar Federatën e Basketbollit të Kosovës, se të gjitha palestrat që do të shfrytëzohen për zgjedhje, duhet të vihen në dispozicion të Komisioneve Komunale të Zgjedhjeve, jo më vonë se dhjetë ditë para datës 12 tetor.
Kështu që, objektet e përcaktuara si Qendra të Numërimit dhe të Rezultateve do të jenë në menaxhim të KKZ-së dhe nuk mund të shfrytëzohen për aktivitete tjera pas 30 shtatorit.
Në mesin e Qendrave Komunale të përcaktuara për procesin e numërimit, janë edhe palestrat “Shani Nushi” në Gjakovë, “Minatori” në Mitrovicë, “1 Tetori” në Prishtinë, “13 Qershori” në Suharekë, “Mizahir Isma” në Rahovec, “Karagaçi” në Pejë dhe “Sezai Surroi” në Prizren.
Duke pasur parasysh gjithë këtë situatë, Tëvë 1, mëson se Bordi i FBK-së, do të mbajë mbledhje urgjente të martën e ardhshme – 30 shtator, për të diskutuar këtë çështje dhe sipas të gjitha gjasave për të dalë me datë të re sa i përket fillimit të sezonit të ri.
