Lidhja Demokratike e Kosovës, ka kritikuar Qeverinë e Kosovës për degradim të sistemit shëndetësor.
Deputeti i Lidhjes Demokratike të Kosovës, Armend Zemaj, ka folur rreth gjendjes së shëndetësisë nën udhëheqjen e Qeverisë aktuale, derisa ka shtuar që dorëheqjet e fundit në Spitalin e Përgjithshëm në Mitrovicë, janë si pasojë e ndërhyrjes politike.
“Kjo qeveri nëse shumë pak ka punuar në fusha të tjera, në shëndetësi nuk ka punuar fare. Ja faktet të cilat tregojnë që nuk ka punuar fare, për tri vite janë ndërruar tre ministra, nuk ka as një strategji në shëndet, më shumë se 200 mjekë po na ikin çdo vit, e për ikjen e tyre nuk ka asnjë reagim nga qeveria. Nuk kemi asnjë investim kaptial, kemi ankesa të njëjta nga të gjitha odat e profesionistëve shëndetësor”, deklaroi Zemaj.
Po ashtu, Zemaj tha se vetë Ministri i Shëndetësisë, Arben Vitia, i ka larguar nga strategjia Ligjin për Shëndetësi dhe për Sigurimet Shëndetësore.
“Fondi shëndetësor të cilin e ka premtuar ministri Vitia që tri vjet nuk e kemi askund, e madje lajmi kryesor i ditës, që po e them për herë të parë në këtë konferencë është se pikërisht ky ministër e ka larguar nga strategjia ligjin për shëndetësi dhe ligjin për sigurimet shëndetësore. Kam informacione të sakta të konfirmuara që ky ligj është bartur për vitin e ardhshëm ashtu siç është bartur që tri vite me radhë. Domethënë prioritetet dhe premtimet që erdhën qeveria në pushtet tani po kalojnë në bartje në vitet e ardhshme”, deklaroi Zemaj.
Më tej, Zemaj ka thënë se Auditimi ka vërtetuar që ka 36 raste në parregullsitë në menaxhimin e kontratave të punës, gjë që sipas tij, Ministria e Shëndetësisë nuk ka investuar aq sa duhet në investimet kapitale.
“Zyra Kombëtare e Auditimit ka vërtetuar se ka 36 raste në parregullsi në menaxhimin e kontratave të punës, parregullsi në procedurën e pagesave dhe shumë raste të tjera. Këtë e sqaron më së miri raporti i shpenzimeve kapitale për periudhën janar-shtator, ku Ministria e Shëndetësisë ka shpenzuar vetëm tetë për qind të buxhetit nga investimet kapitale, zero për qind në pothuajse projektet e premtuara, zero për qind në shpenzime për autoambulanca, zero për qind shpenzime në pajisje të nevojshme shëndetësore”, theksoi Zemaj.
