Përgatitjet për zgjedhjet e 28 nëntorit janë shoqëruar me debate të ashpra mes Lëvizjes Vetëvendosje dhe Lidhjes Demokratike të Kosovës për çështjen e votimit të mërgatës.
Pas ankesës së LDK-së, Paneli Zgjedhor për Ankesa dhe Parashtresa (PZAP) ka rrëzuar vendimin e Komisionit Qendror të Zgjedhjeve (KQZ) për shtimin e qendrave të votimit jashtë vendit.
Ky vendim, sipas kryetarit të LDK-së, Lumir Abdixhiku, siguron integritetin e votës dhe parandalon mundësinë e manipulimeve. Vendimin e PZAP-së e ka mirëpritur edhe PDK-ja.
E Armend Zemaj nga LDK-ja ka kritikuar Lëvizjen Vetëvendosje, duke e konsideruar politikë “të pamoralshme” atë që sipas tij është bërë për të sulmuar LDK-në në lidhje me mërgatën.
“Nuk ka përplasje. Ka një politikë të pamoralshme të VV-së, sepse vazhdimisht përpiqen të trumbetojnë se ka njerëz në subjekte politike që janë kundër mërgatës. Nuk ka njeri në Kosovë që nuk ka një vëlla, motër apo axhë në mërgatë. Por t’i thuash dikujt që lidhjen me mërgatën e ka të hershme që nga ish-presidenti Rugova dhe gjithmonë e ka konsideruar të përhershme, kjo është e pamoralshme dhe polarizon shoqërinë”, tha ai në emisionin “Info Nata” në Tëvë1.
Zemaj, gjithashtu nënvizoi se LDK-ja ka mbrojtur ligjin që vota e mërgimtarëve të jetë e sigurt dhe procesi të realizohet në ambasada dhe jo në vende të pasigurta, si kafene apo qendra joligjore.
“LVV-ja mund të mashtrojë duke thënë se dikush është kundër votuesve, edhe pse qëllimi është mbrojtja e ligjit, integritetit të votës dhe garantimi që vota të kryhet në mënyrë të sigurt”, përfundoi ai. /teve1.info/
