Deputeti i LDK-së, Armend Zemaj në seancën Kuvendit duke folut për pikën 7 të planit evropian tha se nuk e di nëse kryeministri, Albin Kurti e ka parasysh që fëmijëve shqiptarë të Kosovës do t’u nevojiten pasaporta për ta vizituar Manastirin e Deçanit.
“Si është gjendja sot me planin franko-gjerman të negociuar dhe të pranuar nga ju kryeministër? Dil shpjegoje në mënyrë reale pikën 7. Pika 7 është shtatë herë më e rëndë se gjithçka çka Kosova ka pranuar deri më tani. Në pikën 7 të kësaj marrëveshje thuhet se palët do ta zyrtarizojnë statusin e Kishës Ortodokse Serbe në Kosovë dhe do të ofrojnë mbrojtje për objektet e trashëgimisë fetare dhe kulturore serbe në përputhje me modelet ekzistuese evropiane. Kryeministër, shpjegoje zyrtarizimin e statusit të Kishës, për çfarë sigurie po bëhet fjalë, për çfarë statusi po bëhet fjalë? A e di se nëse fëmijët tanë dëshirojnë ta vizitojnë natyrën e bukur rreth Manastirit të Deçanit, duhet të shkojnë me pasaporta? A e di se çfarë po bën, a je në tokë të bukës? Dil e shpjegojë se cilit nivel të duhur të vetëmenaxhimit për komunitetin serb në Kosovë dhe aftësinë për ofrimin e shërbimeve në fusha specifike po i referohesh?”, është shprehur Zemaj.
