Eugen Cakolli nga KDI ka reaguar pas rinumërimit të pjesshëm të votave në disa komuna të Kosovës, duke theksuar se manipulimi i votave ka marrë përmasa industriale dhe kërkon veprime urgjente nga Prokuroria.
“Ku është dhe çka po pret Prokuroria që nuk po nisë hetimet dhe ndjekjet penale për manipulimin e votave të kandidatëve – që në disa vendvotime e komuna kanë marrë përmasa industriale?!”, ka deklaruar Cakolli.
Ai ka vënë në dukje se emrat e komisionerëve për secilën tavolinë numërimi në Qendrën e Numërimit janë të njohur, por manipulimet nuk mund të jenë bërë vetëm nga ta.
“Dhjetëra e qindra vota të shtrembëruara në një vendvotim të vetëm dhe mijëra në nivel komune, kryesisht për kandidatë të caktuar, nuk janë rastësi apo gabim njerëzor.
“Prandaj, përfshirja e kandidatëve të caktuar në këto skema është shumë e mundshme. Hetimi, pashmangshmërisht duhet t’i përfshijë edhe ata”, ka theksuar Cakolli, duke kërkuar që institucionet kompetente të veprojnë pa vonesë për të garantuar integritetin e procesit zgjedhor. /teve1.info/
