Deputeti i LDK-së, Armend Zemaj ka thënë se nga viti në vit ka pasur rritje të buxhetit.
I ftuar në “Info Nata” në Tëvë 1, Zemaj ka thënë se të hyrat buxhetore duhet të orientohen aty ku ka nevojë.
“Historikisht edhe për mbamendjen e qytetarit, prej maslufte, prej kur janë themelu institucionet edhe ato vetqeverisëse, gradualisht ka pas rritje të buxhetit. Edhe nëse e shihni në përqindje, çdo vit buxheti është më i lartë sesa në vitin paraprak”, ka thënë Zemaj.
“Kur të keni buxhet në tërësi dhe krejt Kosova, janë vetëm këto rrugët nacionale që kanë nevojë për asfalt dhe ti e ke një kosto që e ke të realizuar në të kaluarën, ndërsa të hyrat e mëdha buxhetore duhesh me i orientu në zhvillim tjetër të ndonjë sektori tjetër, ose për shëndetësinë, sigurinë ose arsimin”, ka shtuar ai.
Duke folur për buxhetin e ndarë për FSK-në ai ka pyetur se a ka armatim më shumë si rezultat i ndarjes së këtij buxheti.
“Nëse do të kishte rezultate nuk do të kishte ikje të ushtarëve dhe eprorëve në numër të konsiderueshëm gjatë këtyre dy viteve. Në aplikacionet për punë është numër enorm, kudo që ka konkurs njerëzit aplikojnë, sepse është papunësi e madhe. Nuk ka krijim të vendeve të reja të punës dhe adresa e parë janë institucionet publike. Por çka ka brenda saj, ju pyetni në Forcën e Sigurisë cilat janë rezultatet e atij buxheti? A kemi armatim më shumë? A është më e pajisur FSK-ja sot? A janë më të sigurt ata dhe ne dhe kur realizohen këto?”, ka deklaruar Zemaj.
Sipas tij është paaftësi të lihen mjete pa u shpenzuar në kohë inflacioni.
“Për atë po flasim për paaftësi sepse ti mund të kesh buxhet sa të duash, por ju e dini për investime kapitale buxheti është në përqindjen më të ulët. 700 milionë i kemi në Qeveri që i mbesin në kuletë dhe i zhvleftësohen në kohë të inflacionit”, ka deklaruar ai.
