Autoritetet kosovare kanë realizuar një operacion ekshumimi në fshatin Brekoc të Komunës së Gjakovës, ku janë zbuluar eshtra që dyshohet se i përkasin së paku një personi të zhdukur gjatë luftës së viteve 1998-1999 në Kosovë.
Operacioni u krye nga Sektori për hetimin e personave të zhdukur gjatë luftës, në bashkëpunim me Institutin e Mjekësisë Ligjore (IML) dhe Komisionin Qeveritar për Persona të Zhdukur, mbi bazën e një urdhërese të gjykatës.
“Gjatë gërmimeve në vendin e dyshuar, janë hasur eshtra njeriu, me interes forenzik, të cilat dyshohet se i përkasin të paktën një (1) individi, të zhdukur gjatë kohës së luftës në Kosovë. Eshtrat janë tërhequr nga vendi i ngjarjes dhe janë dërguar në IML për ekzaminim mjekoligjor”, thuhet në raportin 24-orësh të Policisë së Kosovës.
Mbetjet do t’i nënshtrohen analizave forenzike për identifikim të mundshëm dhe për të ndihmuar në zbardhjen e fatit të viktimës. Hetimet do të vazhdojnë për të identifikuar personin si dhe për të sqaruar rrethanat e zhdukjes së tij.
Ky rast shton shpresat për zbardhjen e fatit të qindra personave që ende figurojnë të zhdukur nga lufta në Kosovë.
