Shpejtësia e procedimit të marrëveshjes me Danimarkën për burgun e Gjilanit, pas mosmiratimit në Kuvend, po konsiderohet si tentim për kontrabandim i Qeverisë përpara shpërndarjes së Kuvendit. Në anën tjetër, dështimi i votimit të marrëveshjes javën e kaluar, vlerësohet se erdhi nga mungesa e përllogaritjes së numrave.
Javën e kaluar nuk i mori votat e mjaftueshme të ligjvënësve.
Por në ditën e parë të javës, Projektligji për Ratifikimin e Traktatit me Danimarkën për strehimin në burgjet e Kosovës të të burgosurve nga Danimarka mori dritën e gjelbër nga ekzekutivi.
Kësisoj u arrit pajtim për shfrytëzimin e institucionit korrektues në Gjilan.
Por Ministria e Drejtësisë, nuk ka dhënë detaje nëse kjo marrëveshje është rinegociuar përpara votimit në Qeveri.
Me këtë marrëveshje, po vlerësohet se kryeministri Kurti, po krijon “Zajednicë” brenda Shërbimit Korrektues.
“Qeveria po mundohet ta kontrabandojë këtë marrëveshje dhe pasi të shpërndahet Kuvendi pastaj shes si sukses të qeverisë. Kjo marrëveshje është jashtëzakonisht e dëmshme për Kosovën, i dëmton shumë të burgosurit kosovarë, i dëmton shumë Shërbimin Korrektues të Kosovës, e cënon drejtpërdrejt sovranitetin e shtetit, drejpërdrejt e cënon sigurinë e shtetit. Nëse shprehemi me fjalorin e kryeministrit Kurti, kjo është Zajednicë brenda Shërbimit Korrektues të Kosovës”, tha Bexhet Shala nga KMDLNJ.
Ndërkohë, mosvotimi i marrëveshjes javën e kaluar, shihet si mungesë e kalkulimit të numrave nga ana e ekzekutivit.
“Ndoshta kur është sjellë marrëveshja për votim në Kuvend, qeveria nuk i ka bërë hesapet mirë dhe nuk e ka llogaritur që ka deputetë që nuk do të votojnë, dhe nuk ka lobuar në këtë aspekt. Tash kur e ka proceduar me kaq urgjencë, atëherë i bie që i ka siguruar votat e nevojshme dhe po bëhet gati që ta fus prapë në agjendën legjislative”, u shpreh avokati, Arbër Jashari.
Me marrëveshjen në fjalë, Kosova parashihet të përfitojë rreth 200 milionë euro.
