Golden Eagle Ylli pa telashe ka shënuar fitoren e radhës në Superligën e Kosovës në basketboll.
Të enjten, skuadra nga Suhareka triumfoi ndaj Istogut. Ndeshja e luajtur në palestrën “13 Qershori” në Suharekë, u mbyll me fitoren e thellë të Yllit 133:63.
Me këtë fitore, Ylli është ngritur në kuotën e 37 pikëve sa i ka edhe Sigal Prishtina, ekip me të cilin do të përballet të dielën.
Në anën tjetër, Istogu regjistroi humbjen e 22-të këtë edicion në elitë. Alonso Verge me 21 pikë e 7 asistime ishte më i dalluari te Ylli, ndërsa me lojë të mirë u veçua edhe Aaron Jones (15 pikë, 13 kërcime), ndërsa Jan Palokaj pati 16 pikë, 7 kërcime e 5 asistime.
Te Istogu vetëm dy lojtarë e përfunduan ndeshjen me pikë dyshifrore. Arian Azemi me 22 pikë, 6 kërcime e 4 asistime ishte më efikasi, kurse Orges Shatri pati 14 pikë.
