Uniforma e UÇK-së, u vesh sërish në Kuçicë të Skenderajt.
E pas kësaj, këtu arritën edhe një herë ish-komandantët e UCK-së.
Këta të fundit, edhe të hënën u ngritën në këmbë para flamurit që i bashkoi në luftë.
Krejt kjo në përkujtim të 6 prillit, ditën e rënies së ish-ushtarëve të lirisë nga fshati Kuçicë.
Më së rëndi këtë ditë, duket se përjetuan nënat e dëshmorëve.
“Respekt për gjithë që i kanë kontribu vendit të tyre. Rrespekt për nënën e Milazit që sot e kam këtu para veti. Nuk është lehtë as për bashkëluftëtaret e tina, Milazit i cili është vërtet njëri prej atyre i cili me Samin e me shumë bashkëluftëtar tjerë të cilët vërtet kanë kontribu që Kosova sot të jetë ashtu siç është. Uroj që kësi monumentesh të kemi akoma sepse kjo vlen për gjeneratat e reja”, tha kryetari i Skenderajt, Sami Lushtaku.
Me këtë rast, Organizata e Veteranëve të Luftës, e zbuloi edhe këtë pllakë përkujtimore.
“Sot kjo pllakë që po zbulohet, u mbet vendi që pas 5 marsit të ’98-tës, janë rreshtuar Ushtria Çlirimtare e Kosovës, Kuçicë, Klinë e shumë fshatra të tjerë. Edhe shumë mirë e kanë bërë, se pllaka e parë është në nivel të komunës së Skenderajt, që është një pllakë që u bë rreshtimi i ushtarëve të Ushtrisë Çlirimtare të Kosovës. Edhe inshallah do Zoti u bëhet të gjithëve në nivel të komunës së Skenderajt”, tha Emin Lati- kryetar i OVL-UÇK-së në Skenderaj.
Nga Drenica, sërish pati një kërkesë në drejtim të Qeverisë së Kosovës.
“Edhe një thirrje e kam për vlerat e luftës, për deputetët, për komandantët e luftës që të ndalim këtë sharje, këtë thyerje që po na e bën Qeveria e Kosovës. Të mbërrijmë qëllimin e vlerave të luftës, se 28 vite domethënë hala ne nuk kemi një ligj për vlerat e luftës. Asnjë ditë të vetme nuk e kemi një festë shtetërore për vlerat e luftës. Qysh keni ditë me na pri gjatë luftës, duhet me na pri edhe tash për me mbërri synimin tonë” , u shpreh Lati.
Në këtë ceremoni të hënën, po ashtu u nderuan me mirënjohje edhe veteranët e UCK-së nga ky fshat.
