Superliga e Kosovës në basketboll vijon këtë mesjavë me duelet e xhiros së 15-të.
Këto takime do të zhvillohen saktësisht të mërkurën dhe të enjten.
Të mërkurën janë dy takime në program, ku njëri do të zhvillohet në Gjakovë dhe tjetri në Prishtinë.
Në palestrën “Shani Nushi”, Vëllaznimi i Gjakovës do t’i bëjë konak skuadrës së Bashkimit.
Kjo ndeshje pritet të jetë tejet interesante, me gjakovarët që, pas fitores ndaj Pejës, do të mundohen ta befasojnë edhe Bashkimin, ndërsa prizrenasit nga ana tjetër do të tentojnë rikthimin te fitorja pas disfatës nga Bora.
Bashkimi momentalisht ndodhet i dyti në tabelë me 23 pikë, teksa Vëllaznimi i parafundit me 19 pikë në total.
Dueli tjetër i së mërkurës është mes Borës dhe Rahovecit dhe zhvillohet në palestrën “1 Tetori” në kryeqytet.
Këto dy skuadra do të luftojnë deri në fund për të marrë rezultat pozitiv, pasi gjenden në pozitat e poshtme të tabelës.
Rahoveci i Bujar Locit ndodhet në pozitën e fundit në tabelë me 19 pikë, ndërsa në anën tjetër Bora ka një pikë më shumë, që e rendit në vendin e pestë.
Duelet e ditës së enjte janë edhe më interesante.
Në palestrën “Minatori” në Mitrovicë, skuadra e Trepçës do të jetë nikoqire e Pejës.
Përballjet mes këtyre dy skuadrave kanë dhuruar interesim të madh kohëve të fundit, si dhe basketboll cilësor.
Trepça aktualisht është lidere e Superligës, ndërsa në anën tjetër verdhezinjtë ndodhen në pozitën e tretë me tri pikë më pak.
Të dy taboret janë përforcuar në prag të këtij dueli, ku pritet edhe debutimi i lojtarëve të rinj.
Dueli i fundit është ai mes Golden Eagle Yllit dhe Sigal Prishtinës.
Ky takim do të zhvillohet në palestrën “13 Qershori” në Suharekë, me të dy skuadrat që synim kanë vetëm fitoren.
Prishtina do të mundohet ta lërë pas humbjen ndaj Trepçës në xhiron e kaluar, teksa Ylli tenton që para tifozëve të vet ta marrë fitoren e gjashtë sezonale.
Të gjitha takimet zhvillohen nga ora 18:45 dhe mund t’i ndiqni drejtpërdrejt në platformën “Telkos”.
