Kapiteni i Sunderlandit, Granit Xhaka, thotë se ata “duhet të jenë krenarë” për atë që kanë arritur këtë sezon, pasi qëllimi kryesor ishte thjesht të qëndronin në Premier League.
Pas barazimit pa gola të së shtunës kundër Manchester Unitedit, ka pasur shumë diskutime në media rreth mungesës së një avantazhi klinik për Sunderlandin.
Kur u pyet nëse Sunderlandi ka pasur vështirësi në shënimin e golave këtë sezon, Xhaka u përgjigj se a nuk është e mjaftueshme që kanë tubuar 48 pikë, duke kujtuar se Sunderlandi këtë sezon është rikthyer në Premier League.
“Kërkesat nga jashtë janë të mëdha dhe ne po kërkojmë edhe nga njëri-tjetri të shënojmë gola dhe të mos pësojmë shumë. Ky është sezoni ynë i parë së bashku me shumë fytyra të reja. Duhet kohë, kështu që thjesht duhet të jemi krenarë për atë që po bëjmë në këtë moment sepse po kalojmë një sezon të shkëlqyer. Objektivi ishte të mbijetonim, të merrnim sa më shumë pikë të ishte e mundur dhe të shihnim se ku ishim në fund”, ka thënë Xhaka.
Mesfushori shqiptar ka insistuar se tani fokusi i Sunderlandit është për dy ndeshjet e fundit të sezonit, ku do të përballet me Evertonin në udhëtim dhe Chelsean në shtëpi.
Xhaka para fillimit të këtij sezoni iu bashkua Sunderlandit, ekip me të cilin ka kontratë deri në vitin 2028 dhe për të cilin ka shënuar 1 gol dhe ka bërë 6 asistime në 32 ndeshje kampionale.
