Deputeti I Lidhjes Demokratike të Kosovës, Krenar Xhaferi, ka komentuar vënien e gurthemeleve të dy urave të reja mbi lumin Ibër duke thënë se urat nuk krijojnë pengesa por bashkëpunime.
Megjithatë, Xhaferi vlerëson se për këto veprime duhet të ketë bashkëpunim të Qeverisë së Kosovës me Bashkimin Evropian për të mos pasur masa ndëshkuese më pas.
“Unë kujtoj që urat vetëm krijojnë bashkëpunime dhe nuk krijojnë pengesa, kështu që në këtë kontekst vlerësoj se mund të jetë veprim i mirë. Normalisht që duhet të ketë koordinime sepse pastaj po kemi ngecje edhe në diskutime të mëvonshme ose po kemi masa nga Bashkimi Evropian, kështu që unë mendoj që duhet njëherë të shteren diskutimet e pastaj të vazhdohet me punët në terren”, është shprehur ai në emisionin “Ditari” në Tëvë1.
I pyetur nëse e sheh pjesën e veriut si një shfrytëzim për fushatë politike, ai tha se dëshiron të besojë që nuk janë duke u bërë kalkulime të tilla.
“Unë mendoj që në një realitet normal veriu nuk duhet me u pa dhe nuk duhet me e u shfrytëzu në aspektin e zgjedhjeve lokale sepse e dimë si është situata në veri dhe normalisht që nuk duhet të futemi në kalkulime të tilla. Unë dua të besoj që këto gurthemele nuk ishin të tilla”, ka thënë Xhaferi.
