“Ka dhjetëra raste gjatë këtyre pesë viteve që jam Presidente, ku pavarësisht faktit që kam dalë me qëndrime krejtësisht të kundërta me ato të qeverisë, përsëri nuk ju ka rënë të gjithë mirë, janë ankuar e akuzuar. Pavarësisht këtyre akuzave që do të vijnë sot, nesër e pasnesër do të vendos dhe do të mbroj interesin e Republikës së Kosovë”.
Kështu u përgjigj një ditë më parë, e para e shtetit, Vjosa Osmani kur u pyet se a është data e zgjedhjeve në linjë me Vetëvendosjen.
Por edhe një ditë pas, sipas profesorit Kolë Krasniqi veprimi i saj po lexohet i tillë në opinionin publik.
Krasniqi tha se kjo po bëhet për shkak të mërgimtarëve.
Por këto kritika si kontradiktore po i shohin Lëvizja Vetëvendosje.
Zëdhënësi i këtij subjekti politik, Arlind Manxhuka thotë se ky vendim ka ardhur për disa arsye.
“Kritikat drejtuar presidentes Osmani se ka anuar kah LVV, në njërën anë dhe deklarimet se nuk frikësohen nga vota e mërgatës, në anën tjetër, janë deklarime të pabazuara përveçse thellësisht kontradiktore. Ne kemi qëndruar për datën 28 dhjetor, porse për këtë vendim ka pasur disa arsye tërësisht objektive. Këta zëra kritikë të Presidentes Osmani për datën 28 dhjetor shprehin sa frikën në të vërtetë aq edhe dëshirën në realitet që për mërgatën votimi të jetë sa më e vështirë. Kësisoj, Presidentja Osmani dje pas takimit me liderë të partive politike deklaroi se për datën e zgjedhjeve kishte vendosur në bazë të një mori arsyesh objektive. Ndërkaq, bazuar në deklarimet e partive ajo njoftoi se 8 subjekte politike kishin qenë për datën 28 dhjetor, 5 për 21 dhjetor dhe 3 për cilindo nga këto dy opsionet. Po ashtu, në kuadër të vendimit kishte parasysh vlerësimin e KQZ për afat sa më të përshtatshëm, meqenëse ky vit ishte vit i ngarkuar zgjedhor dhe ende ishim praktikisht në procese të zgjedhjeve të fundit lokale”.
Njëjtë sikur Manxhuka, mendon edhe profesori universitar Mazllum Baraliu.
Ky i fundit thotë se një javë më shumë është shumë e rëndësishme për procesin nga Komisioni Qendror Zgjedhor.
Të enjten u nënshkrua dekreti për shpërndarje të Kuvendit të Kosovës dhe u shpallën zgjedhjet e reja pasi mandatari i dytë, Glauk Konjufca nuk arriti të formojë Qeverinë.
