Protestat në Prishtinë, të organizuara pas vrasjes së 49-vjeçares Arlinda Zekaj, do të vazhdojnë edhe të shtunën.
Kolektivi për Mendim dhe Veprim Feminist ka njoftuar se protesta e radhës do të nisë në orën 17:00, me kërkesën që institucionet përgjegjëse të japin llogari për dështimet që i paraprinë rastit tragjik.
Sipas njoftimit të organizatorëve, protestuesit do të mblidhen në sheshin “Zahir Pajaziti”, prej nga do të marshojnë drejt ndërtesës së Qeverisë së Kosovës dhe Këshillit Prokurorial të Kosovës.
Kolektivi ka bërë të ditur se mobilizimi qytetar do të vazhdojë derisa të përmbushen kërkesat e tyre dhe institucionet të marrin përgjegjësinë për veprimet dhe mosveprimet e tyre.
Në thirrjen publike, organizatorët kanë ftuar qytetarët që t’u bashkohen protestave, duke theksuar se kërkojnë drejtësi për Arlindën dhe për të gjitha gratë që janë vrarë.
Protestat në kryeqytet po zhvillohen tash e tri ditë. Protestuesit fillimisht kanë kërkuar dorëheqjen apo shkarkimin e ministrave të Drejtësisë dhe të Punëve të Brendshme, ndërsa gjatë protestës së së premtes kërkesat u zgjeruan edhe ndaj sistemit të drejtësisë, përfshirë përgjegjësinë e gjyqësorit.
Arlinda Zekaj, 49-vjeçare, u vra më 25 tetor. Për këtë vrasje është arrestuar si i dyshuar ish-kunati i saj, Albert Sylaj.
Rasti ka ngritur shqetësime të mëdha për mënyrën se si institucionet kanë trajtuar denoncimet dhe kërkesat e viktimës për mbrojtje. Ditën e vrasjes, ish-bashkëshorti i saj, Jeton Sylaj, ishte ndaluar nga policia, pasi Zekaj e kishte raportuar për mosrespektim të urdhrit mbrojtës.
Po ashtu, vetëm tri ditë para se të vritej, ajo i kishte dërguar një letër kryeprokurores së Pejës, duke e paralajmëruar se jeta e saj ishte në rrezik.
Pas ngjarjes, janë suspenduar kryeprokurorja e Pejës, një prokurore dhe 11 zyrtarë policorë, ndërsa drejtori i Policisë, Gazmend Hoxha ka dhënë dorëheqje./teve1.info/
