Këshilli i Përgjithshëm i Lëvizjes Vetëvendosje pritet të mblidhet sot, ku përveç çështjeve organizative, në rend dite do të jetë edhe tema e zgjedhjes së Presidentit të Kosovës.
Lajmin e konfirmoi kryetari i partisë dhe njëherësh kryeministri i Kosovës, Albin Kurti, pas takimit që zhvilloi një ditë më parë me kryetarin e Partisë Demokratike të Kosovës, Bedri Hamza.
Sipas Kurtit, mbledhja nuk është thirrur posaçërisht për çështjen e Presidentit, por vjen si pjesë e obligimeve statutore të partisë, e cila mban katër mbledhje në vit.
Ai theksoi se viti 2026 është vit zgjedhor brenda Vetëvendosjes, çka kërkon përgatitje dhe organizim të brendshëm.
Megjithatë, Kurti bëri të ditur se situata politike dhe procesi i zgjedhjes së Presidentit do të diskutohen.
Ai paralajmëroi se në mungesë të një marrëveshjeje politike apo kandidature konsensuale, subjektet politike mund të paraqesin propozimet e tyre partiake për kreun e shtetit.
“Ne do ta kemi mbledhjen e Këshillit të Përgjithshëm të Lëvizjes Vetëvendosje nesër. Natyrisht që mbledhjen e nesërme nuk e kemi thirrur enkas për çështjen e Presidentit të Republikës. E kemi thirrur para se gjithash, për shkak se është obligim statutor i yni kronologjik që t’i kemi katër mbledhje në vit, pra çdo tre muaj, dhe sidomos për shkak se sivjet, 2026-a është vit zgjedhor në Lëvizjen Vetëvendosje.Tash na duhen përgatitje të reja në LVV, por natyrisht që do ta diskutojmë edhe këtë çështje. Dhe duket që, kur s’ka mundësi për marrëveshje politike, kur s’ka mundësi për propozim konsensual, atëherë do të kemi propozime partiake që do të merren vesh shpejt”, deklaroi Kurti para mediave.
