Qetësia e ka kapluar gjithë zonën.
Rrugët janë të pafrekuentuara.
Pas disa kilometrash, kjo rrugë ilegale thellë në veriun e Kosovës, bëhet vështirë e kalueshme.
Vazhdimi i kësaj rruge të dërgon në territorin e Serbisë.
Pikërisht në këtë rrugë, pasditen e së shtunës, dyshohet që Millan Vukashinoviq, erdhi për të blerë mjaltë nga një banor.
Mirëpo, ai u ballafaqua me një ngjarje të pazakontë.
Me të rënë terri në fshatin Jellackë, brenda territorit të Kosovës, Vukashinoviqit i dolën disa persona të maskuar e me uniforma ngjyrë të gjelbër.
Ata dyshohet të kenë qenë pjesëtarë të xhandarmërisë serbe.
Vukashinoviq tentoi t’u ikte këtyre personave, mirëpo ata më pastaj shtien në drejtim të tij duke e lënë të plagosur.
Me ta plagosur, personat e maskuar e morën Vukashinoviqin duke e dërguar në Serbi, saktësisht në një spital në qytetin e Nishit.
Sipas asaj që ka treguar avokati serb Ivan Niniq, Vukashinoviq është plagosur në boshtin kurrizor, dhe plumbin ende e ka në trup, si dhe ka disa plagë në afërsi të zemrës.
Tëvë1 ka tentuar që të marrë një përgjigje nga shoku i Vukashinoviq tek i cili ai kishte shkuar për të blerë mjaltë.
Mësohet se Millan Vukashinoviq vazhdimisht kishte qenë në presion nga grupi “Brigada e Veriut”, pasi kishte refuzuar që të jepte dorëheqje nga pozita e tij në Byronë Kosovare të Sigurimeve në Jarinje, në kohën kur serbët dhanë dorëheqje masive nga pozitat në institucionet e Kosovës.
Sot ekipi i televizionit ishte edhe në vendin e punës së Millan Vukashinovq, por nga aty nuk pranuan të flasin.
Që situata të mbetët e qetë dhe nën kontroll, në magjistralen Leposaviq-Jarinje u panë forca të shtuara të KFOR-it britanik, por edhe makineri te rënda të këtij misioni paqeruajtës.
Për këtë ngjarje ka reaguar edhe Presidentja Vjosa Osmani, e cila e fajësoi direkt Serbinë.
Ndërkaq, nga Policia e Kosovës kanë theksuar se hetimet për ta ndriçuar në plotni këtë rast, po vazhdojnë në bashkëpunim me KFOR-in.
Situata në brezin kufitar Kosovë – Serbi vlerësohet e qetë.
