Deklaratat në drejtim të Kosovës së fundi i ka shpeshtuar.
Presidenti i Serbisë Aleksandër Vuçiq, përveç lotëve të derdhur kundër anëtarësimit të Kosovës në KiE, tash po arsyetohet edhe për referendumin në katër komunat veriore.
Vuçiq në konferencë të përbashkët për media me presidentin e entitetit të Republikës Serbe, Milorad Dodik, e ka quajtur faktorin ndërkombëtar “ gënjeshtar”.
Vuçiq më pas tha se “QUINT-i u ka thënë serbëve të bëjnë peticion dhe për të kaluar, duhet të mblidhen edhe 20 për qind të nënshkrimeve të votuesve të regjistruar, ndërsa pranoi se nuk ka numër të mjaftueshëm të serbëve për shkarkimin e kryetarëve në veri.
“Dhe kur përkundër gjithë dredhive të Kurtit i mbledhim ato nënshkrime, na thonë – jo, hajde të shkojmë në referendum. E në referendum duhet 50 për qind plus 1 votë. Epo, nuk ka aq shumë serbë duke jetuar…u regjistruan 862 persona”, tha Vuçiq.
Këto deklarata, politologu. Fidan Ukaj i sheh si arsyetim të Vuçiqit për të larguar presionin e ndërkombëtarëve.
Sipas tij, ky është veç një skenarë i Serbisë.
“Është një arsyetim i Serbisë, e cila siç duket ka qenë një skenarë që nga fillimi i nënshkrimit të peticionit dhe ky ka qenë qëllimi dhe synimi i Serbisë, që ta largoi presionin ndërkombëtarë mbi Listën Serbe dhe Beogradin, dhe në anën tjetër të fajëson Kosovën si shtet i cili nuk është i sinqertë në organizmin e këtij procesi”, tha ai.
Serbia vazhdimisht është duke lobuar kundër anëtarësimit të Kosovës në Këshillin e Evropës.
Të premten, ajo ka dërguar një letër shteteve anëtare në KiE, duke iu kërkuar të mos votojnë për anëtarësimin e Kosovës në këtë organizatë ndërkombëtare.
Ukaj thotë se Beogradi zyrtar, tashmë e ka shkelur marrëveshjen e arritur në Ohër, në të cilët qartazi thuhet se vendet nuk duhet të lobojnë kundër çdo anëtarësimi në organizatat ndërkombëtare.
“Serbia po e shkel akordimin e Brukselit dhe Ohërit, dhe formimi i ekipit për me prolongu rrugën e Kosovës për në Këshillin e Evropës, është dëshmi e qartë se Serbia akordimin e Brukselit dhe Ohërit dhe letrat që i ka dërguar Bashkimit Evropian, se do të jetë selektiv në implementimin e marrëveshjeve të dakorduara më herët”, tha politologu.
Kosovës i ka mbetur edhe një hap për të kaluar në votimin përfundimtar nga ministrat e shteteve anëtare në Këshillin e Evropës.
