Një person është dërguar i vdekur në Qendrën Klinike Universitare të Kosovës (QKUK), pas plagëve të marra nga arma e zjarrit në një ngjarje të rëndë që ndodhi mbrëmë në Hajvali.
Drejtori i Klinikës Emergjente në QKUK, Naser Syla, për televizionin Tëvë1, konfirmoi se viktima mbërriti në spital pa shenja jete. Ai tha se personi kishte plagë nga arma e zjarrit dhe nuk ka mundur të shpëtojë.
“Në QKUK ka ardhur i vdekur me plagë nga arma e zjarrit,” deklaroi Syla, duke shtuar se për rastin janë angazhuar të gjitha njësitë emergjente për trajtimin e urgjencës, por fatkeqësisht nuk ka pasur shpresa për jetën e viktimës.
Ngjarja e rëndë ndodhi rreth orës 22:00 në Hajvali, kur Policia mori njoftimin për të shtëna me armë zjarri dhe një person të plagosur rëndë. Sipas zëdhënëses së Policisë së Kosovës, Flora Ahmeti, viktima është një mashkull, i cili ka ndërruar jetë në vendngjarje para se të dërgohej në spital.
“Sot rreth orës 22:00, është raportuar për gjuajtje me armë zjarri në Hajvali, ku është vrarë një person. Vdekja e viktimës është konfirmuar nga ekipi mjekësor në QKUK,” tha Ahmeti për Tëvë1.
Policia ka nisur hetimet për zbardhjen e plotë të rrethanave të ngjarjes dhe është në kërkim të personit të dyshuar, i cili tashmë është identifikuar. “Hetimet vazhdojnë dhe jemi duke bërë të gjitha përpjekjet për të arrestuar të dyshuarin dhe për të zbuluar motivin e vrasjes,” theksoi Ahmeti.
