Vrasja e Naser Gashit tronditi Prishtinën të martën mbrëma.
Një breshëri plumbash të shkrepura brenda një lokali në rrugën “Rrustem Hyseni”, lanë të vdekur 62 vjeçarin.
I plagosur atë mbrëmje mbeti edhe Miftar Miftari.
I dyshuar për këtë rast, është Alban Gashi, i cili prej natës kritike ndodhet në arrati.
E nga arratia, Gashi, përmes avokatit të tijj, Fanol Krasniqi, ia ka dërguar një letër organeve të rendit.
Aty, ai e ka treguar verzionin e tij të ngjarjes, i cili është krejt i ndryshëm nga ajo që është raportuar deri më sot.
Sipas Alban Gashit, i ndjeri u vra nga plumbat që i shkrepi i plagosuri Miftar Miftari.
“Pasi mësoi vendodhjen e Miftar Miftarit, Alban Gashi bashkë me një person NN, shkojnë në vendin e ngjarjes. Alban Gashi posedonte një armë të tipit TT, kurse miku i tij NN, një kallashnikov. Me të hyrë Gashi në lokal, Miftari kishte lëshuar një zë dhe kishte kërkuar nga mysafirët që të mos lëvizin, dhe për një moment Miftari gjuan në drejtim të Gashit katër herë, duke e plagosur në këmbën e djathtë. Më tej, pas zbrazjes së municionit nga ana e Miftarit, i njëjti repetit armën dhe afrohet në distancë të afërt dhe e godet dy herë në këmbë dhe një herë në dorë, dhe më pas Gashi afrohet ia merr armën Miftar Miftarit dhe me të me pjesën e kondakut e godet disa herë në kokë dhe përfundimisht largohet në një vend të panjohur”, thuhet në letrën e tij.
Kështu, Alban Gashi, në letrën e siguruar nga Betimi për Drejtësi, pretendon se nuk ka asnjë mundësi që nga gjuajtja e tij të ishte goditur tashmë i ndjeri.
“Alban Gashi pretendon se nuk ka mundësi që nga gjuajtja e tij të jetë goditur tani ndjeri N.G., por është goditur nga e shtëna e Miftarit. Po ashtu, i dyshuari pretendon se nuk e kishte qëllimin të gjuajë në drejtim të Miftarit, por që ta rrihte për shkak të fyerjeve të rënda që ia kishte bërë kohë më parë. Por, me të hyrë në lokal Gashi ishte plagosur nga Miftari, duke u detyruar që ta mbrojë vetem dhe ta zmbrapsë sulmin” thuhet tutje.
Sipas letrës, Alban Gashi dhe Miftar Miftari kanë një histori të përplasjeve.
“Zanafilla e problemit të Gashit me Miftarin (i njohur me nofkën Duqi) ka nisur në shtetin e Spanjës, kur Miftari kishte qenë në lidhje me një grua, e cila më pas ishte lidhur me një person me emrin Alban (mbiemri i të cilit nuk dihet), por Mifari kishte menduar se ishte vetë Gashi. Miftari e ka sharë e ofenduar Gashin me anëtarë të familjes- gruan e vajzën e mitur, deri te kërcënimi për babanë e tij. Më pas, thuhet se Miftari i kishte shkuar Gashit edhe tek banesa ku e kishte kanosur me thikë, madje kishte tentuar ta therte”, shkruhet tutje.
Për shkak të plagëve të marra nga ndodhia e së martës mbrëma, Mifar Miftari akoma ndodhet i shtrirë në spital.
