Një 20-vjeçar nga Kosova ka mbetur i vrarë të dielën në një sulm me armë zjarri në qytetin e Uppsalës, në Suedi.
Viktima është identifikuar si Gent (Milot) Maksutaj, nga fshati Banjë i Istogut.
Sipas mediave suedeze, vrasja dyshohet të ketë qenë një ekzekutim i planifikuar.
Mediat suedeze bëjnë me dije se autori i dyshuar ka lëvizur me biçikletë dhe e ka qëlluar fillimisht viktimën. Pasi 20-vjeçari ka rënë në tokë, ai dyshohet se është afruar dhe ka qëlluar sërish.
Pas krimit, i dyshuari raportohet se është larguar me tren drejt Stokholmit, ku më pas është arrestuar nga policia.
Prokuroria suedeze ka bërë të ditur se në lidhje me ngjarjen është ndaluar një person nën moshën 18 vjeç.
Megjithatë, hetuesit nuk përjashtojnë mundësinë që në vrasje të jenë përfshirë edhe persona të tjerë.
Si dyshohet se ndodhi ngjarja?
Rreth orës 21:00 të së dielës, policia ka marrë një alarm për të shtëna me armë zjarri në zonën Kvarngärdet në Uppsala.
Menjëherë është ndërmarrë një operacion i madh policor, ku janë angazhuar disa patrulla, ndërsa zona është rrethuar plotësisht.
Në vendngjarje janë parë edhe dy autoambulanca.
Fillimisht, autoritetet nuk kanë dhënë shumë detaje për rastin, por më vonë është konfirmuar se një burrë në të njëzetat ka humbur jetën si pasojë e plagëve të marra nga arma e zjarrit.
Familjarët e viktimës janë njoftuar për ngjarjen e rëndë.
Ndërkohë, autoritetet suedeze vijojnë hetimet për të zbardhur motivin e krimit dhe nuk kanë konfirmuar ende nëse vrasja lidhet me grupet e krimit të organizuar.
