Një 62-vjeçar nga fshati Serbicë e Poshtme e Prizrenit është arrestuar nën dyshimin për kryerjen e veprës penale “vjedhje e rëndë”, pasi dyshohet se ka vjedhur disa qengja me vlerë rreth 1 mijë euro.
Sipas njoftimit të Policisë së Kosovës, i dyshuari me inicialet D.T. dyshohet se më 14 qershor 2026 ka vjedhur disa qengja në fshatin Piranë të Prizrenit dhe më pas i ka shitur tek persona të ndryshëm.
Policia bën të ditur se më 23 qershor 2026, rreth orës 13:00, hetuesit nga Stacioni Policor Prizren Veri kanë arritur ta identifikojnë dhe lokalizojnë të dyshuarin, ndaj të cilit, me vendim të prokurorit të shtetit, është caktuar masa e ndalimit policor prej 48 orësh dhe është ngritur kallëzim penal.
“Në vazhdim të hetimeve, më 24 qershor 2026, hetuesit policorë kanë gjetur tre nga qengjat e vjedhur në oborrin e një shtëpie në fshatin Serbicë e Poshtme”, thuhet në njoftim.
Pas përfundimit të procedurave ligjore, bagëtitë e sekuestruara i janë kthyer pronarit të tyre.
Policia ka bërë të ditur se hetimet po vazhdojnë për identifikimin e personave të tjerë që mund të jenë të përfshirë në këtë rast.
“Policia e Kosovës mbetet e përkushtuar në mbrojtjen e pronës së qytetarëve dhe garantimin e sigurisë publike, duke vepruar me profesionalizëm dhe në bashkëpunim të ngushtë me Prokurorinë e Shtetit”, thuhet në njoftimin e policisë.
