Presidentja e Kosovës, Vjosa Osmani, është takuar me Presidentin e Emirateve të Bashkuara Arabe, Sheikh Mohamed bin Zayed Al Nahyan, ku ka shprehur mirënjohjen për mbështetjen e vazhdueshme të këtij vendi ndaj Kosovës.
“E nderuar me mikpritjen dhe diskutimet gjithnjë përmbajtësore me Presidentin e Emirateve, Lartmadhërinë e Tij, Sheikh Mohamed bin Zayed Al Nahyan, të cilin e falënderova për lidershipin e tij vizionar dhe për mbështetjen e vazhdueshme për Kosovën, që nga ditët më të vështira e deri më sot. Përgjatë viteve, kemi hapur një epokë të re të partneritetit ndërmjet dy vendeve tona, nga liberalizimi i vizave e deri te kontributet e çmuara të Emirateve në fusha konkrete të zhvillimit”, ka shkruar Osmani.
Presidentja ka theksuar veçanërisht mbështetjen e Emirateve në fushën e shëndetësisë dhe projektin e ndërtimit të spitalit të ri të gjinekologjisë. “Shpreha mirënjohjen e popullit të Kosovës për kontributin e Emirateve në shëndetësi, si dhe për vijimin me projektin e rëndësishëm të ndërtimit të spitalit të ri të gjinekologjisë, i mbështetur në dakordimin tonë të mëhershëm”, ka shtuar ajo.
Osmani gjithashtu ka vlerësuar mirëkuptimin dhe mbështetjen e Presidentit të Emirateve për projekte të reja në fushën e shëndetësisë dhe në fusha të tjera zhvillimore. “Kosova është e bekuar me mbështetjen e vazhdueshme të Presidentit Mohamed bin Zayed dhe të të gjithë popullit të Emirateve”, ka përfunduar ajo.
