Vizita e ministrit të Mbrojtjes së Serbisë, Bratislav Gashiq dhe shefit të Shtabit të Përgjithshëm të Ushtrisë serbe, gjeneralit Milan Mojsiloviq në bazën ushtarake “Ornica”, pranë vijës administrative me Kosovën, ka ngjallur reagime në vend.
Eksperti i sigurisë, Agim Musliu e ka cilësuar këtë vizitë si një provokim të qëllimshëm dhe pjesë të propagandës nacionaliste të regjimit të presidentit serb, Aleksandar Vuçiq.
“Ky është një tjetër provokim i qëllimshëm i Aleksandar Vuçiqit, i cili shfrytëzon ushtrinë serbe për propagandë nacionaliste, në përpjekje të qartë për të zhvendosur vëmendjen nga krizat e brendshme politike dhe protestat masive në Serbi,” deklaroi Musliu në një postim në Facebook.
Ai theksoi se përdorimi i ushtrisë për qëllime politike përbën një mesazh të rrezikshëm për stabilitetin në rajon.
“Si analist i sigurisë, e konsideroj provokuese dhe destabilizuese këtë vizitë të ministrit të Mbrojtjes Bratislav Gashiq dhe shefit të Shtabit të Përgjithshëm, gjeneral Milan Mojsiloviq, në bazën ushtarake Ornica. Kjo është pjesë e përpjekjeve të vazhdueshme për të militarizuar krizën dhe për të inskenuar kërcënime të jashtme, në funksion të shmangies së llogaridhënies së regjimit. Përdorimi i ushtrisë për qëllime politike është një mesazh i rrezikshëm për stabilitetin rajonal”, ka shkruar ai.
Sipas Musliut, vendosja e theksit në forcat ushtarake në kufi me Kosovën nuk ka lidhje me sigurinë, por me ndërtimin e një narrative destabilizuese që i shërben interesave politike të pushtetit në Beograd.
“Serbia duhet të ndalë këtë aventurizëm dhe të fokusohet në zgjidhjen e problemeve të saj të brendshme, jo në prodhimin e krizave artificiale”, shkroi Musliu.
Mediat serbe raportojnë se vizita në bazën “Ornica” u zhvillua si pjesë e mbikëqyrjes së vijës administrative dhe e inspektimeve në Zonën Tokësore të Sigurisë.
