Procesi i Brukselit ishte temë edhe të enjten në Pragë.
Presidentja e vendit, Vjosa Osmani, tha se në kryeqendrën e Çekisë, i ka treguar kancelarit gjerman Olaf Scholz dhe presidentit francez Emmanuel Macron, për vijat e kuqe të Kosovës në procesin e dialogut.
“Para presidentit Macron dhe kancelarit Scholz kam paraqitur cilat janë vijat tona të kuqe që kanë të bëjnë me mbrojtjen e integritetit territorial, sovranitetin e vendit, kushtetutshmërinë dhe po ashtu rëndësinë e jashtëzakonshme që Kosova të mbetet shtet funksional, të mos lejojmë zgjidhje që më shumë shkaktojnë probleme sesa sjellin më shumë paqe e stabilitet në rajon”, tha Osmani.
Sipas njohësit të çështjeve të dialogut, Visar Xani, përmendja e vijave të kuqe nënkupton që negociatat kanë hyrë në një fazë kritike.
“Duket që ka disa sinjale për këto temat e nxehta, ndaj edhe presidentja Osmani në këtë konferencë ju ka treguar që vijat e kuqe në të cilat Kosova nuk bënë kompromis. Këto vijat e kuqe janë tash e sa vite në këtë proces të dialogut të cilat përmenden herë pas here, pra duket që ka ardhur pak a shumë presioni pak ma i lartë dhe bashkësia me komuna serbe, mbase është ajo pika që pak më shumë e dekoncentron palën kosovare”, tha Xani.
E deputeti i Lëvizjes Vetëvendosje, Haki Abazi ka kritikuar ndërmjetësuesin e dialogut Miroslav Lajçak, që po e mban peng integrimin e Kosovës me anë të procesit të dialogut.
“Lajçak ka vazhduar ta mbajë agjendën tonë integruese peng të dialogut dhe në këtë kuptim, Serbia ka vazhduar që dialogun ta përdorë si formë të shantazhit dhe përjashtimit të Kosovës nga proceset integruese… Ndërmjetësuesi, Lajqak ka arritur që edhe liberalizmin e vizave ta bëjë pjesë të dialogut, por edhe njohjet e reja gjithashtu”, tha Abazi.
Republika e Kosovës dhe Serbia janë dakorduar që të takohen çdo muaj në kuadër të dialogut, por që në muajin shtator nuk ka pasur asnjë takim.
Kronika e gazetarit Valmir Gallopeni.
