Policia e Kosovës ka dhënë detaje të reja lidhur me vrasjen që ndodhi të mërkurën në Suharekë, ku një person humbi jetën si pasojë e plagëve të marra nga të shtënat me armë zjarri.
Sipas raportit 24-orësh të Policisë, ngjarja ka ndodhur më 18 nëntor 2026, rreth orës 12:11, pas një konflikti verbal mes dy personave.
I dyshuari, një shtetas kosovar, dyshohet se ka shtënë me armë zjarri në drejtim të viktimës, duke i shkaktuar plagë të rënda trupore.
Viktima është dërguar për trajtim mjekësor në Spitalin e Prizrenit, ku rreth orës 13:03 ka ndërruar jetë.
Pas ngjarjes, Policia ka arrestuar të dyshuarin, të cilit i është konfiskuar një revole me 24 fishekë, si dhe disa gëzhoja.
Ndërkaq, gjatë bastisjes së shtëpisë së të dyshuarit, njësitë hetimore kanë gjetur dhe konfiskuar edhe 47 fishekë të tjerë dhe një shumë parash të gatshme.
Me vendim të prokurorit, i dyshuari është dërguar në mbajtje, ndërsa trupi i pajetë i viktimës është dërguar në Institutin e Mjekësisë Ligjore (IML) për procedurat e mëtejme.
Rasti është iniciuar si “Vrasje e rëndë”.
Policia e Kosovës, në raportin 24-orësh, ka bërë të ditur:
“Raportohet se i dyshuari mashkull kosovar pas një konflikti verbal, ka shtënë me armë zjarri në drejtim të viktimës mashkull kosovar. Viktima ka pësuar lëndime të rënda dhe është dërguar në spitalin e Prizrenit ku dyshohet se rreth orës 13:03 ka ndërruar jetë. I dyshuari është arrestuar dhe nga ai është konfiskuar një revole me 24 fishekë dhe disa gëzhoja”.







