Një aksident i rëndë ka ndodhur sot në fshatin Zemanic të Leposaviqit, ku një i mitur ka humbur jetën pasi është përmbysur me traktor.
Ngjarja ka ndodhur më 10 shtator 2025, rreth orës 11:00. Lajmin e ka konfirmuar për Tëvë1 zëvendëskomandanti i Policisë për Veriun, Veton Elshani, i cili tha se viktima ishte adoleshent.
“Rreth orës 11:00, morëm njoftim nga shërbimi i Ndihmës së Shpejtë se në këtë fshat kishte ndodhur një aksident. Kur shkuam në vendngjarje bashkë me ta, ekipi mjekësor konstatoi vdekjen në vend të djalit i cili ishte i lindur në vitin 2008. Ai ka ndërruar jetë si pasojë e lëndimeve të marra kur u përmbys me traktor,” u shpreh Elshani.
Policia njofton se viktima është identifikuar si D.P., 16 vjeç. Sipas deklarimeve të dëshmitarëve, i mituri ishte duke tërhequr një lis me traktor kur mjeti bujqësor u rrotullua, duke i shkaktuar lëndime të rënda që rezultuan fatale.
“Njësitë policore kanë dalë menjëherë në vendngjarje, ndërsa nga stafi mjekësor është konstatuar vdekja e viktimës në vend,” thuhet në njoftimin e Policisë.
Lidhur me rastin është njoftuar Prokurori i Shtetit, i cili ka urdhëruar që rasti të iniciohet si “Vdekje e dyshimtë”. Me urdhër të prokurorit, trupi i pajetë i viktimës i është dorëzuar familjarëve.
