Ministrja e Arsimit, Arbërie Nagavci, ka bërë të ditur se së bashku me kryeministrin e vendit, Albin Kurti, kanë vendosur sot, gur-themelin e shkollës fillore dhe të mesme të ulët “Fan Noli” në Kamenicë.
Projekti i kësaj shkolle përfshin një sipërfaqe prej 5,088.63 m², dhe vlera e objektit është 1,694.452.62 euro. Sipas Nagavcit, ndërtimi i shkollës pritet të përfundojë brenda 3 viteve, raporton teve1.info.
Nisja e punimeve të shkollës, përkon me shënimin e ditës së humbjes së rilindësit të shquar, Fan Nolit, ku për këtë ministrja ka thënë se: “është krenari që kjo shkollë mban emrin e tij, dhe njëkohësisht na forcon besimin se këto nxënëse e nxënës do të japin kontribut po aq të çmuar për vendin”.
Përmes një postimi në Facebook ajo ka shkruar se infrastruktura arsimore është parakusht për zhvillimin e ambienteve miqësore për fëmijët dhe i kontribuon mësimdhënies së avancuar.
“Arsimi cilësor dhe gjithëpërfshirës është prioritet i kësaj qeverisjeje. Për këtë arsye, po punojmë me shumë përkushtim që secila shkollë e secili mësues të jetë i gatshëm e i motivuar për t’u ndihmuar fëmijëve të shfrytëzojnë potencialin e tyre të plotë”, ka shkruar ministrja.
