Këtë të mërkurë Gjykata Supreme e Kosovës refuzoi padinë për vendosjen e mbulesës në shkolla.
Me këtë vendim, gjykata ka konfirmuar se Ministria e Arsimit ka të drejtë ligjore të përcaktojë rregulla për uniformën dhe sjelljen e nxënësve.
Padia ishte paraqitur nga organizata “Rrjeti i Femrave për Zhvillim Profesional – Arrita”, e cila kishte kërkuar që të shfuqizohej neni i Udhëzimit Administrativ që ndalon bartjen e mbulesës islame në shkolla.
Organizata kishte pretenduar se ndalimi i shamisë cenon të drejtën kushtetuese për liri fetare.
Por Gjykata Supreme ka vlerësuar se Udhëzimi Administrativ Nr. 06/2014 i Ministrisë së Arsimit është në përputhje me Ligjin për Arsimin Parauniversitar dhe Ligjin për Arsimin dhe Aftësimin Profesional.
“Nga këto dispozita rezulton se Ministria e Arsimit, Shkencës dhe Teknologjisë, ka autorizim të qartë ligjor për të përcaktuar rregulla për sjelljen e nxënësve, përfshirë edhe rregullat për veshjen – uniformën. Rrjedhimisht, akti nënligjor është në përputhje me autorizimin e shprehur ligjor të dhënë nga ligjvënësi. Përcaktimi sikurse në aktin e kontestuar, me të cilin ndalohet bartja e uniformës fetare në shkolla, gjen mbështetje në një akt më të lartë ligjor për nga fuqia hierarkike, andaj si i tillë nuk mund të shfuqizohet”, thuhet nga Supremja.
Në arsyetim, Gjykata ka kujtuar se edhe Gjykata Kushtetuese e Kosovës dhe Gjykata Evropiane për të Drejtat e Njeriut kanë pranuar se shtetet mund të vendosin kufizime të tilla për të ruajtur neutralitetin dhe harmoninë fetare në shkolla publike.
“Në pikën 76 të aktvendimit të saj ka theksuar se: liria fetare është kryesisht një çështje e ndërgjegjes individuale dhe përfshin edhe manifestimin e fesë në mënyrë private dhe publike, por nuk mbulon çdo veprim të motivuar nga feja. Në një shoqëri demokratike ku bashkëjetojnë fe të ndryshme, kjo liri mund të kufizohet për të ruajtur harmoninë dhe respektin për besimet e të gjithë qytetarëve, duke theksuar rolin neutral dhe të paanshëm të shtetit si garant i tolerancës fetare. Gjykata ka vënë në dukje se rregullat lidhur me bartjen e simboleve fetare në institucionet arsimore ndryshojnë nga vendi në vend, duke u bazuar në traditat kombëtare dhe nevojën për mbrojtjen e të drejtave dhe rendit publik”, thuhet tutje.
Megjithatë, këtë vendim të Supremes, po e kundërshton avokati Asdren Bytyqi, i cili thekson e drejta e shkollimit dhe arsimimit duhet të jetë një e drejtë fundamentale.
“Që prevalon mbi çfarëdo lloj interpretimi me nuance ideologjike sekulariste nga gjyqtarët e Gjykatës Supreme dhe natyrisht kjo nuk është përfundimtar. Kjo hapë derë që të parashtrojmë kërkesë pranë Gjykatës Kushtetuese për vlerësimin e kushtuetshmërisë dhe ligjshmërisë së këtij vendimi, i cili mund të jetë përfundimtar dhe duhet të jetë në frymën e respektimit të drejtave të njeriut sipas standardeve të shteteve Evropiane të cilat janë obligative për tu marruar si model vendimet e tyre dhe Gjykatës Evropiane të të Drejtave të Njeriut nga ana e Gjykatës Kushtetuese”, vlerëson avokati Bytyqi.
Për këtë vendim kanë reaguar edhe nga World Hijab Day Kosova, duke thënë se më këtë vendim shteti i Kosovës ka dështuar në testin e demokracisë.
