Vëllaznimi ka mbetur pa njërin nga lojtarët më të rëndësishëm të këtij sezoni.
Trajneri i skuadrës, Rajko Krivokapiq, ka konfirmuar dje se Marques Warrick do të largohet nga ekipi, duke hapur rrugën për një transferim të tij në basketbollin izraelit.
Warrick është padyshim një nga emrat më të spikatur të Superligës së Kosovës këtë edicion, duke kryesuar listën e koshashenuesve me një mesatare prej 21.8 pikësh për ndeshje. Forma e tij e lartë kulmoi edhe në ndeshjen e fundit me gjakovarët, ku ai shpërtheu me 27 pikë, duke qenë thjesht i jashtëzakonshëm dhe vendimtar.
Largimi i tij paraqet një goditje të madhe për Vëllaznimin në një moment delikat të sezonit, teksa skuadra do të duhet të gjejë mënyra të reja për të mbajtur ritmin pa liderin e saj ofensiv.
Në ditët në vijim pritet të konfirmohet edhe zyrtarisht transferimi i Warrick në kampionatin izraelit.
