Një analizë e re tregon se numri i vdekjeve nga kanceri në botë do të rritet me rreth 75% deri në vitin 2050, pavarësisht përparimeve në trajtime dhe përpjekjeve për uljen e faktorëve të rrezikut.
Parashikohet që në vitin 2050 të humbin jetën 18.6 milionë njerëz, ndërsa rastet e reja të kancerit pritet të arrijnë në 30.5 milionë, një rritje mbi 60%, shkruan burimi Euronews Health transmeton Gazeta Shneta.
Studimi i botuar në revistën “Lancet”, thekson se rritja e popullsisë dhe plakja e saj janë arsyet kryesore të kësaj shtese. Aktualisht, mbi 40% e vdekjeve nga kanceri lidhen me 44 faktorë të ndryshueshëm si duhani, dieta e pashëndetshme dhe niveli i lartë i sheqerit në gjak.
Tek burrat, 46% e vdekjeve në vitin 2023 u shkaktuan nga duhani, dieta, alkooli, rreziqet profesionale dhe ndotja e ajrit. Tek gratë, 36% e rasteve lidhen kryesisht me duhanin, obezitetin, dietën e pashëndetshme, seksin e pasigurt dhe hipergliceminë.
“Ekzistojnë mundësi të mëdha për vendet të adresojnë këta faktorë dhe të parandalojnë shumë raste të kancerit,” tha Dr. Theo Vos nga Instituti për Matjen dhe Vlerësimin e Shëndetit në SHBA.
Raporti, që mbulon 47 lloje kanceri në 204 vende nga viti 1990 deri në 2023, paralajmëron se vendet me të ardhura të ulëta do të goditen më rëndë, duke përbërë mbi gjysmën e rasteve të reja dhe dy të tretat e vdekjeve deri në vitin 2050.
Studiuesit kërkojnë përmirësim të qasjes në diagnostikim më të shpejtë, trajtim cilësor dhe kujdes mbështetës. “Ka ndërhyrje me kosto efektive për çdo vend, pavarësisht nivelit të zhvillimit,” theksoi Meghnath Dhimal nga Këshilli i Kërkimeve Shëndetësore në Nepal.
