Në oborrin e familjes Gashi, vizitat për ngushëllime kanë nisur.
Kjo pasi një ditë më parë, foshnja e tyre një vjeç e gjysmë vdiq në Spitalin e Përgjithshëm në Pejë.
E për këtë janë ngritur dyshime se nga ky Spital, fëmijës nuk iu ofrua kujdesi mjekësor adekuat.
Televizioni tentoi të marrë një qëndrim nga familjarët, por të njëjtit nuk pranuan të prononcohen para kamerës.
Mirëpo prapa saj, ata thanë se janë të shokuar nga ngjarja dhe nuk preferojnë të flasin deri në publikimin e rezultateve të obduksionit.
E lidhur me rastin, Policia e Kosovës ka nisur hetimet.
Sipas raportit policor, babai i fëmijës ka njoftuar se të mërkurën e kishte dërguar foshnjën në spital për trajtim, por pas procedurave mjekësore ajo ishte liruar për në shtëpi.
Të enjten, pas përkeqësimit të gjendjes së fëmijës, prindi e kishte dërguar sërish në spital, ku mjekët kanë konstatuar vdekjen e tij.
“Policia është informuar nga spitali rajonal në Pejë se një fëmijë është pa shenja jete, njësitë relevante në Pejë menjëherë kanë shkuar në vendin e ngjarjes në Emergjencën e spitalit. Nga stafi mjekësor jemi njoftuar se fëmija është pranuar rreth orës 07:00 të mëngjesit të ditës së njëjtë. Edhe përkundër ndihmës së ofruar nga ekipi mjekësor, rreth 08:50 është konstatuar vdekja e fëmiut. Në konsultim me prokurorin kujdestar, rasti është cilësuar si ‘Trajtim i pandërgjegjshëm mjekësor’”, thuhet nga Policia e Kosovës.
Mirëpo, përmes një njoftimi për media, Spitali i Përgjithshëm i Pejës ka mohuar të ketë pasur neglizhencë nga stafi i tyre mjekësor.
“Në mëngjesin e datës 6 nëntor 2025, rreth orës 07:00, fëmija është sjellë sërish në spital, këtë herë në gjendje të rëndë, me ç’rregullime të vetëdijes dhe probleme serioze në frymëmarrje. Menjëherë është trajtuar nga ekipi i mjekëve me oksigjen dhe terapi mbështetëse, por për shkak të përkeqësimit të gjendjes është kryer intubimi nga ekipi i anesteziologëve. Pavarësisht masave reanimatore të ndërmarra me përkushtim dhe sipas protokolleve mjekësore, fatkeqësisht fëmija ka ndërruar jetë në orën 08:50”.
Me urdhër të prokurorit, trupi i pajetë është dërguar në Institutin e Mjekësisë Ligjore për obduksion, ku pritet të përcaktohet shkaku i saktë i vdekjes.
Kronikë e realizuar nga gazetarja, Adea Mustafaj.
