Autori: Jona Kelmendi
U nisën drejt varrezave të fshatit Keçekollë në Prishtinë.
Zyrtarë policorë, familjarë dhe dashamirë u mblodhën aty.
E gjithë kjo për t’i dhënë lamtumirën e fundit kolegut, familjarit të tyre, Ismet Isufit.
Isufi ishte zyrtar policor i Policisë së Kosovës, i cili vdiq të hënën.
Fillimisht rasti ishte raportuar si aksident trafiku, ndërsa sipas dyshimeve të para, ai kishte pësuar atak kardiak para përfshirjes në aksident.
“Veç prezenca e juve na bon mu ndje shumë krenar edhe bon me tregu çfarë njeri ka qenë ai, unë ju falënderoj nga zemra secilit që keni gjet kohë me ardh, në veçanti falënderoj kolegët e babës, për babën me fol ju besoj e keni njoft çfarë njeri u kon. Ne e kemi humb një prind, e kemi humb një vëlla, e ju e keni humb një koleg shumë të mirë edhe shumë të angazhum në punën e vet”, ka thënë Isufi.
Dhimbje për të ndjerin ndau edhe kolegu i tij, Major Ismail Fejzullahu.
“Humbja e tij është e rëndë për familjen por edhe për Policinë e Kosovës, si edhe për secilin prej nesh që e patën fatin ta njohin. Do të na mungojë prezenca e tij, buzëqeshja, fjalët e mençura dhe dëgjimi i pa lodhur profesional. Në këto momente, e ndajmë dhimbjen me familjen Isufi, shprehim mirënjohjen tonë për këtë trim, për jetën dhe veprën e Ismet Isufit. Kujtimi i tij do të qëndrojë gjithmonë në zemrat tona. U prefsh në paqe kolegu jonë”, u shpreh Fejzullahu.
Isufi u përcoll për në banesën e fundit me nderime shtetërore nga kolegët e tij.
