Kandidati për kryetar të Prishtinës nga radhët e PDK-së, Uran Ismaili, ka prezantuar planin e tij për lagjen Matiçan, ku tha se prioritetet e tij janë projekte të realizueshme që adresojnë nevojat e përditshme të qytetarëve.
Ai theksoi se nuk do të premtojë projekte madhështore e afatgjata, por zgjidhje konkrete për infrastrukturë, ndriçim, ujë të pijshëm, transport publik dhe hapësira për rekreacion.
Plani përfshin ndërtimin e një çerdheje, rinovimin e shkollës “Mitrush Kuteli”, krijimin e dy parqeve të reja, shtigje për biçikleta, terrene sportive dhe një qendër komunitare multifunksionale.
Ismaili po ashtu përsëriti zotimin për llogaridhënie, duke thënë se nëse nuk arrin të realizojë 90% të premtimeve, nuk do të garojë për një mandat të dytë.
Sipas tij, ky plan do ta shndërrojë Matiçanin në një hapësirë funksionale, të sigurt dhe të barabartë për të gjithë banorët. /teve1.info/
