Universiteti i Prishtinës, ka dalë me një sqarim pas reagimeve që u bënë lidhur me mbajtjen e mbledhjes së Këshillit të Përgjithshëm të Lëvizjes Vetëvendosje, brenda hapësirave të UP-së.
Në një njoftim për media është bërë e ditur se leja për shfrytëzimin sallës është dhënë në pajtim me vendimin aktual që është në fuqi.
Në reagimin e UP-së është cekur se vendimi thotë që hapësirat e UP-së mund të vihen në dispozicion të palëve të treta, gjatë ditëve të fundjavës.
“Në këtë vendim, ndër të tjera, ceket se ‘hapësirat e kufizuara të UP-së mund të vihen edhe në dispozicion të palëve të treta, kur bashkëpunimi nuk lidhet drejtpërdrejt me fushat e mësimdhënies, kërkimit shkencor apo përfitimeve tjera akademike e profesionale’, por kjo gjë ndodh vetëm gjatë ditëve të fundjavës, kur ato ‘aktivitete nuk pengojnë proceset mësimore, kërkimore apo administrative të Universitetit të Prishtinës’. Për më shumë, në vendim ceket edhe se hapësirat e kufizuara të UP-së nuk mund të vihen në dispozicion në kohë të fushatave zgjedhore”, thuhet në reagim.
Sot, mbledhja e sotme e Këshillit të VV-së u mbajt në objektin e Universitetit të Prishtinës, ku për këtë ka reaguar deputetja e Kuvendit të Kosovës nga radhët e LDK-së, Jehona Lushaku-Sadriu dhe ajo e PDK-së, Eliza Hoxha.
Hoxha mbledhjen brenda hapësirave të universitetit e cilësoi abuzim, ndërsa Lushaku tha se LVV-ja nuk respektoi pavarësinë institucionale të UP-së, por e përdorën “si vegël”.
