Ministri i Jashtëm i Ukrainës, Andrii Sybiha, ka vlerësuar publikisht qëndrimin e Shqipërisë dhe mbështetjen e saj ndaj Ukrainës, përmes një mesazhi të publikuar në rrjetin social “X”, ku shpërndau edhe reagimin e ministrit shqiptar për Evropën dhe Punët e Jashtme, Ferit Hoxha.
Në reagimin e tij, kryediplomati ukrainas shprehu mirënjohjen për solidaritetin e Tiranës zyrtare, duke theksuar se kërcënimet ndaj diplomatëve dhe civilëve tregojnë shpërfilljen e Rusisë ndaj përpjekjeve për paqe.
“Ne e vlerësojmë qëndrimin parimor dhe të fortë të Shqipërisë. Kërcënimet ndaj diplomatëve dhe civilëve vetëm sa e ekspozojnë më tej shpërfilljen e Rusisë për përpjekjet e paqes. Ukraina vlerëson solidaritetin dhe mbështetjen e palëkundur të Shqipërisë. Së bashku, ne qëndrojmë për paqen, sigurinë dhe drejtësinë”, shkroi Sybiha.
Mesazhi i ministrit ukrainas vjen në vijim të tensioneve diplomatike dhe reagimeve ndërkombëtare pas deklaratave të fundit të autoriteteve ruse, të cilat u kanë bërë thirrje diplomatëve dhe shtetasve të huaj të largohen nga Kievi përpara sulmeve të paralajmëruara.
Më herët, ministri shqiptar Ferit Hoxha e cilësoi këtë veprim si të papranueshëm dhe në kundërshtim me normat ndërkombëtare.
Në një postim në platformën “X”, ai deklaroi se “kërcënimi i ambasadave nuk është diplomaci, por intimidim”, duke e konsideruar një tjetër shkelje të Konventës së Vjenës për Marrëdhëniet Diplomatike.
“Shqipëria e konsideron njoftimin e Rusisë ku u bën thirrje personelit diplomatik dhe qytetarëve të huaj të largohen nga Kievi përpara sulmeve të planifikuara si krejtësisht të papranueshëm. Kërcënimi i ambasadave nuk është diplomaci; është intimidim”, theksoi Hoxha.
Ai shtoi se Shqipëria nuk do të tërhiqet nga Kievi dhe do të vazhdojë mbështetjen për Ukrainën, duke qëndruar në solidaritet me institucionet dhe popullin ukrainas.
Ky shkëmbim mesazhesh vjen në një periudhë tensionesh të shtuara në konfliktin ruso-ukrainas, ndërsa Shqipëria ka mbajtur një qëndrim të qartë në mbështetje të sovranitetit dhe integritetit territorial të Ukrainës në organizatat ndërkombëtare.
Shqipëria refuzon kërkesën e Rusisë për largimin e diplomatëve nga Kievi
