Politologu, Fidan Ukaj, ngutinë e qeverisë për hapjen e urës, e sheh si veprim elektoral në këtë kohë para caktimit të datës së zgjedhjes.
Ukaj, vlerëson se edhe pse rrethanat për hapjen e urës janë më të mira se asnjëherë më parë, hapja e saj kërkon edhe pak kohë.
“Kjo ngutia për me e hap urën në këtë peiudhë kohe kur jemi në caktimin e një date zgjedhore, mendoj se po tingëllon edhe po shihet edhe në opinion publik e po ashtu edhe më gjerë si një veprim elektoral i Qeverisë së Kosovës. Ura sigurisht që duhet të hapet , të gjitha rrethanat e mundësojnë një gjë të tillë, edhe nga ekspertë të sigurisë të gjithë flasin për një qetësi, rehati dhe një mundësi të hapjes së kësaj ure, sepse asnjëherë më herët nuk ka qenë një ligjshmëri e tillë në veriun e Kosovës dhe si duket edhe komuniteti serb është dakord që ura të hapet, por se mendoj që kërkon edhe një kohë të caktuar”, ka thënë ai në emisionin “Ditari” në tëvë1.
Sipas tij, edhe nëse raporti për stabilitetin e urës del pozitiv, siguria atje nuk cenohet sepse ky raport flet për qëndrueshmërinë e urës dhe jo për stabilitetin e situates atje, pasi që për këtë gjë flasin element të tjerë.
“Raporti flet për qëndrueshmërinë e urës, për mundësinë e peshës sa mban peshë ura , nuk ka të bëjë asgjë me destabilizimin ose eskalimin e situates. Janë elemente të tjerë që flasin për një gjë të tillë, e që raportet vendore e po ashtu prezenca e policisë së Eulexit, KFORIT, mendoj se e kanë shtrirë legjitimetin në atë pjesë të vendit dhe po ashtu edhe ekspertë të sigurisë, e po ashtu edhe institucionet kredibile të Kosovës që merren me këto tema, flasin për një stabilitet edhe një qetësi në atë pjesë të vendit”, ka shtuar politologu.
Por, Ukaj ka cekur deklaratë e ambasadorit amerikan që e ka lexuar në emër të shteteve të QUINT-it e që kërkohet që në këtë fazë të mos bëhet hapja e urës.
Ai ka thënë se qëndrimet e Kurtit për disa veprime kanë lënduar raportet me ndërkombëtarët.
Ukaj ka kritikuar edhe Bashkimin Evropian për mosmbajtje të premtimit për hapjen e urës sipas marrëveshjes së arritur në Bruksel./teve1.info/
