Politologu, Fidan Ukaj, ka thënë se deklaratat e kryeministrit të Shqipërisë, Edi Rama, kanë qenë shumë të pasinqerta pas anulimit të mbledhjes së përbashkët të dy qeverive në Gjakovë.
Ukaj, tha se deklaratat e Ramës kanë qenë të pasinqerta pasi që ai ka deklaruar se nuk mund të ketë një takim pas situatës së tensionuar në veri të Kosovës.
“Unë e dëgjova të plotë deklarimin e zotit Rama, të gjitha fjalët që ai i tha ishin shumë të pasinqerta, për arsye që siç e tha ai që nuk mund të kemi një takim kur atje është fati i Kosovës dhe takimi mbahej pikërisht të nesërmen. Nëse ti ke kërkuar 72 orë një takim me kryeministrin Kurti dhe nuk ke arritur ta takosh, të nesërmen e ke takimin në mes të dy qeverive, ke për ta takuar Kurtin dhe po e ndërpret këtë takim shumë të rëndësishëm që do të ishin edhe 13 marrëveshje të nënshkruara. Mendoj që ka qenë shumë e pasinqertë nga ana e zotit Rama”, tha ai në emisionin “Ditari” në Tëvë1.
Sipas Ukaj, kryeministri shqiptar ka bërë gabim kur ka prezantuar draftin për Asociacionin para kancelarit të Gjermanisë, Olaf Scholz dhe presidentit të Francës, Emanuel Macron, pa u konsultuar me institucionet e Kosovës.
“Rama ka bërë një gabim të radhës, besoj ai e di – draftimin e një Asociacioni të Komunave me Shumicë Serbe, i vetmi organ legal dhe legjitim që mund ta bëjë janë një ekip menaxhuese. Kryeministri i shtetit shqiptarë me ekspertit siç thotë ai me ekspertët më të mirë evropian e formon një draft dhe ia dërgon zotit Macron dhe Scholz dhe nuk i konsulton institucionet e Kosovës, të cilat e kanë edhe për obligim ta formojnë atë ekip menaxhuese ose eventualisht të shoh se ky draft që zoti Rama pretendon se është i mirë, a është në harmoni me legjislacionin e Kosovës dhe kushtetutën e vendit. Unë mendoj që është një gatim i zotit Rama”, tha politologu.
Mes tjerash, Ukaj tha se drafti i prezantuar nga Rama nuk është obligativ për institucionet e Kosovës.
“Ky draft i zotit Rama nuk është obligativ për institucionet e Kosovës, mund të jetë një draft siç janë edhe disa drafte të tjera. Ne nuk e kemi obligim ta marrim atë draft. Mbetet të shihet se çfarë përmban”, shtoi ai./teve1.info/
