U promovua libri “Kur heshtja flet” i ish-diplomatit , Ahmet Shala, që i kushtohet gjykimit në Hagë kundër ish-drejtuesve të UÇK-së siç u tha, padrejtësive, me të cilat u përballën ata gjatë këtij procesit tash e mbi pesë vjet.
Në promovim, autori Ahmet Shala tha se librin e shkroi si një qytetar, që ka parë, ka dëgjuar, ka përjetuar vetë dhimbjen që nuk shuhet – drejtësinë e vonuar.
“Ky libër nuk lindi për të qenë thjeshtë një botim, lindi si nevojë e shpirtit tim, si një ndjenjë e thellë gjatë e ndrydhur dhe si një zë që shpërtheu fare spontanisht. Nuk shkrova si akademik, por si një njeri i thjeshtë i këtij vendi. Shkrova si një qytetar, qe ka parë, ka dëgjuar dhe ka përjetuar vetë dhimbjen që nuk shuhet, drejtësinë e vonuar. Flasin ata qe sot prehen në parajsë. Janë aty ku nuk duhet të ishin, heshtja i ka rënduar më shumë se çdo fjalë, heshtja jonë. Historia e Kosovës nuk ndahet në kapituj, sikurse historitë e botës. Është një e vetme, e pashkëputur”, u shpreh Shala.
Ndërsa, presidentja e Kosovës Vjosa Osmani, tha se historia e vendit duhet të mbrohet në çdo vend e kohë dhe për ta mbrojtur duhet të shkruhet, siç e bëri Ahmet Shala.
“Liria ishte më e shtrenjtë sesa vetë jeta. Këtë histori e të vërtetë ne duhet ta mbrojmë me krenari në çdo kohë e vend, kudo në botë, sepse UÇK-ja është ideali më i fuqishëm i ndërtuar nga shqiptarët ndër shekuj. Për ta mbrojtur të vërtetën ne duhet ta shkruajmë atë. Historia nuk flet domosdo gjithmonë me zë të lartë. Ai na sjellë përballë të vërtetën e Hagës, takimet me ish-udhëheqësit e UÇK-së dhe vizitat duke kthyer heshtjen në zë të fuqishëm. Ky libër trajton jo vetëm rrëfimin personal të Shalës, por edhe gjykimin e padrejtë që po bëhet ndaj vetë proceseve tona jetike. Në libër përshkruhen pasojat e luftës nga masakra të shumta, plagë që koha nuk i shëron”, tha presidentja Osmani.
Ndërsa, kryeministri i Shqipërisë, Edi Rama, tha se Gjykatën Speciale e votuan vetë me dorën e tyre krerët e UÇK-së, porse nuk e dinin se do të ishte e njëanshme.
Rama përmendi edhe kërcënimin që ka marrë për rresht dy vjet presidentja Vjosa Osmani, e cila, siç tha, nuk ka lejuar prokurorët të kontrollonin zyrën e institucionit të presidentit.
Ai theksoi se prokurorët në Hagë janë instrumentë të një gjykate, e cila është më politike sesa gjykata e Serbisë në raport me Kosovën.
“Nuk ka asnjë lidhje aktiviteti i tyre me UÇK-në me terrorin, me popullsinë civile, me spastrimin etnik, me varre masiv,e me shënjestrimin e fëmijëve dhe të grave nga snajperët e vendosur aty me këtë qëllim apo me përdhunime, me vrasje, me mbytje njerëzish në lum. Asgjë. Ata nuk u armatosën për të imponuar sundimin e tyre në një territor të huaj, por për të hequr qafe sundimin e të huajve në tokën e tyre. Dhe faktikisht ata vetë me dorën e tyre e votuan në Parlamentin e Kosovës një gjykatë, e cila në letër është një gjykatë e Kosovës, nuk është një gjykatë për të vendosur në bankën e të akuzuarve Kosovën.
Sot jemi në kushtet, kur ka marrë formë thuajse përfundimtare, pasi fjalën e fundit e ka gjykata, një plan shumë afatgjatë, i cili ka nisur me raportin famëkeq që mos të gjet kurrë prehej aty ku është Dick Marti për trafikim të organeve nga udhëheqja e UÇK-së. Dhe ai plan është shtyrë përpara nga përfaqësuesit e Vladimir Putinit në Këshillin e Evropës. Edhe presidentja e Kosovës është kërcënuar dhe këtë gjë nuk e dini. Unë po e them për herë të parë sot, sepse nuk ka lejuar që prokurorët të dhunonin zyrën e institucionit të presidentit të Kosovës se do të kërkonin edhe aty prova të krimeve kundër njerëzimit. Kërcënimi i presidentes ka zgjatur dy vjet, por për nderin e saj dhe të Kosovës ajo ka ndaluar një gjë të tillë. Ata prokurorët janë instrumente të një gjykate, e cila ëahtë edhe më politike sesa gjykatat e Serbisë në raport me Kosovën. Ne sot duhet të bëjmë një pikëpyetje për veten tonë se ccgatë duhet të bëjmë, nuk e kam përgjigjen për këtë, por jam i sigurtë se duhet të bëjmë më shumë për këtë, sepse është një katastrofë për vetë drejtësinë ndërkombëtare, vetë Evropën, për Perëndimin demokratik, të cilin Kosova e testoi”, u shpreh Rama.
Ndërsa, ministri i Mbrojtjes i Kosovës, Ejup Maqedonci, tha se karakteri i luftës së UÇK-së ishin arsye pse vendet që përfaqësojnë vlerat demokratike mbështetën luftën e drejtë të popullit tonë për liri.
“Është një libër që synon të ruajë historinë tonë nga tentativa për ta rishkruar atë. Jam i bindur se asnjë proces gjyqësor dhe asnjë tentativë për të dënuar muk do arrijë të bëj dhe as të ndryshojë natyrën e luftës sonë. Do të mbetet humane, e drejtë dhe e pastër, kurse karakteri i luftës sonë do të mbetet gjithmonë çlirimtare. Karakteri i luftës sonë ishin arsyej pse vendet që përfaqësojnë vlerat demokratike mbështetën luftën e drejtë të popullit tonë për liri. Qëndrojmë me shpresë se do t’i kemi së shpejti drejtuesit e UÇK-SË në mesin tonë”, shtoi Maqedonci.
Kryetari i BDI-së në Maqedoni të Veriut, Ali Ahmeti tha se do të veprohet guximshëm për të vërtetën.
“Ti kishe përnetuar me humbjen e njerëzve më të dashur të gjakut tënd dhe flisje po ashtu me dhembshuri edhe për familjet e të rënëve të Kosovës dhe familjet e çlirimtarëve që padrejtësisht janë në pranga vetëm e vetëm se luftuan për liri dhe dinjitet të kombit që ata i takonin.. Të gjithë e dimë se këtu po bëhet një gjyq i padrejtë, akuza për vepra të pabëra vetëm e vetëm se ishin atdhetarë çlirimtarë dhe organizatorë për rezistencë e luftë. Ne nuk do thyhemi, ashtu siç nuk thyhen edhe familjet e shokëve tanë, bashkëluftëtarëve tanë, të cilët gjenden në Hagë. Ne do të veprojmë, guximshëm për të vërtetën”, shtoi ai.
