Kryeministri Edi Rama do të mikpresë të martën Presidentin e Këshillit Evropian, António Costa, i cili viziton Tiranën si pjesë e turit të tij diplomatik në gjashtë vendet e Ballkanit Perëndimor.
Vizita zhvillohet në kuadër të përgatitjeve për Samitin BE–Ballkani Perëndimor që do të mbahet më 5 qershor në Tivat të Malit të Zi.
Samiti po mbahet gjashtë muaj pas samitit të fundit në Bruksel, duke riafirmuar forcimin e marrëdhënieve të BE-së me Ballkanin Perëndimor.
Nesër, pas takimit të përbashkët mes dy delegacioneve, Kryeministri Rama dhe Presidenti i Këshillit të Europës Antonio Costa do të mbajnë një konferencë të përbashkët për shtyp.
Për Shqipërinë, vizita e presidentit të Këshillit Evropian vjen në një kohë kur Brukseli po kërkon rezultate konkrete nga vendet kandidate, ndërsa Tirana synon të mbyllë negociatat dhe të anëtarësohet në Bashkimin Europian brenda vitit 2030.
Presidenti i Këshillit Evropian, António Costa, ka nisur sot turin e tij diplomatik në gjashtë vendet e Ballkanit Perëndimor, me fokus tek procesi i zgjerimit të Bashkimit Evropian dhe forcimi i bashkëpunimit me partnerët e rajonit.
Vizita e parë u zhvillua këtë të hënë në Sarajevë, ku Costa u takua me anëtarët e Presidencës së Bosnjë-Hercegovinës dhe më pas me kryetaren e Këshillit të Ministrave, Borjana Krišto.
Ky takim shënon hapin e parë të një turi që pritet të përfshijë të gjitha vendet e rajonit, duke i dhënë një shtysë të re dialogut për integrimin evropian./rtsh.al/
